УВЕР ЙОГЫН

«У шӱкалтыш лиеш»

15 январьыште официальный церемонийыште Марий Эл вуйлатыше Александр Евстифеев лийын. Россий президент Владимир Путинын Федеральный Собраний деке лекме посланийже нерген тудо тыге каласен:

— Тиде посланийыште кугу тӱткыш демографий, еш-влаклан социальный полышым пуымо, еҥ-влакын илыш качествыштым саемдыме, парышыштым кугемдыме йодыш-влаклан пӧлеклалтын. Президент лач нине направленийлан кугыжаныш эн кугу тӱткышым ойыра манын палемден. Но йоча шукырак шочмаш, илыш качестве саеммаш еш-влаклан социальный выплатым кугемдыме дене веле огыл кушкеш, кеч тидат, мутат уке, моткоч сай, а моло полыш дене пырля, мутлан, нацпроект-влакым илышыш пуртымо дене, лиеш. Марий Элланат демографий йодыш ик эн тӱҥ. Кодшо кечылаште гына ме Йошкар-Олаште эше ик йочасадым почна.

Александр Евстифеев ешарен: президентын посланийыштыже чыла направлений шотышто раш задаче палемдалтын. Нуно экономике, здравоохранений, образований, моло сфере дене кылдалтыныт да нине направлений денак ынде вашталтыш-влак лийыт. Федеральный законодательствыш да Конституцийыш пуртышаш кӱлешан вашталтыш-влакат йоҥгеныт.

— Тиде посланий республикым вияҥдаш да лекше йодыш-влакым рашемдаш у шӱкалтыш лиеш, — палемден республик вуйлатыше Александр Евстифеев.

 

Марий Эл вуйлатышын организаций да аналитике виктемжын уверже негызеш Л.КАМАЛЕТДИНОВА ямдылен

Опубликовать в Одноклассники

Добавить комментарий