26, 27 апрельыште М.Шкетан лӱмеш марий национальный драме театрыште «Вий-ар – ме» («Биармий») лӱман рок-опер лиеш.
Тудым сценыш Карел национальный театрын художественный вуйлатышыже, драматург, режиссер Сергей Пронин луктеш.
Кызыт артист-влак режиссёр дене пырля кажне кечын пӱжвӱдым йоктарен репетицийым эртарат. Ончыгече театр труппо журналист да блогер-влаклан у постановко гыч изирак ужаш-влакым ончыктыш.
— Марий театрын труппыжо виян, мурышо артист-влакат улыт, сандене тыгай спектакльым шындаш тыштак шоненам. Вет марий театр дене ме шукертсек кылым кучена. У постановкышто тӱҥалтыш гыч мучаш марте фонограмме йоҥга, а артист-влак шке йӱкышт дене мурат, — ойла Сергей Сергеевич. — Мутат уке, тудо оркестр почеш йӧршын вес семын, сайынрак, йоҥга ыле. Марий йылме дене ямдылалтше рок-оперым марий калык сайын вашлиеш манын ӱшанена. Театр эре уым кычалшаш, а тиде постановко поснак самырык-влаклан лишыл лийшаш. Мемнан элысе чыла гаяк национальный театр ик нелылык дене тӱкна – кызытсе йылме да драматургий.
У постановкышто йӧратымаш, шочмо элым пагалымаш, калыкын лӱддымылыкшӧ нерген ойлалтеш. Спектакльыште керде дене кредалмым эскераш оҥай лийшаш, вет але марте марий театрын сценыштыже тыгайым ужмо огылла чучеш.
Артист-влакын костюмыштат ойыртемалтше.
Икманаш, кызыт театрыште паша шолеш: чыла цех шке сомылжым шукта.
А.Байкова.
