Тыге маналтыт кугыжаныш марий йылме программе почеш 5, 6, 7, 8 класс-влаклан марий йылме учебный пособий негызеш ямдылыме паша тетрадь-влак. Паша-влак марий кугыжаныш йылмым тунемше-шамычлан келыштарыме улыт. Кажне тетрадь 12 блок-темым авалта. Нуно йоча-влакын ийготыштым шотыш налын чоҥалтыныт да тушко тӱрлӧ нелытан шкешотан заданий-влак пурталтыныт.
Тыге. Тӱҥалтыш школышто марий йылме дене шинчымашым налынат? Тугеже тудым умбакыже келгемдыман. Поро йолташ, тиде пашам шукташ тыланет паша тетрадь полшаш тӱҥалеш. Тетрадьлаште пуымо паша-влак ийготым, классым шотыш налын, текстын содержанийжым умылымым тергаш, йодышлан вашмутым пуаш, правил-влакым ойлончышто да мутланымаште кучылт моштымым пеҥгыдемдаш полшат. Йодыш-влакым рушла пуэныт гын, вашмут марла лийшаш.
Икманаш, шонаш таратыше творческий паша-влак йылмым тунемаш кумылым нӧлташ тӱҥалыт, тунемше ден туныктышо-шамычлан пайдале полыш лийыт.
Паша тетрадь-влакым Финляндийысе М.А.Кастрен лӱмеш обществын полшымыж дене «Марий Эл» газет редакцийыште савыктыме.
Е.Эшкинина.
