Тенийсе идалык эпидемий шарлыме дене веле огыл, ялозанлыклан игече сай лийме денат шарналт кодын. Санденак кодшо ийысе дене таҥастарымаште шурно лектышна 30, а шӧр лӱштышна 10 процентлан ешаралтыныт. Ты амал денак пашадарнат кушкын. А чыла тидланже техникым уэмдымынат полшен – урлыкашым аяртыме, пырчым оптымо, рулоным тыгыдемдыме да кормам пуэдыме агрегатлам, вольык ончышо-влакым шупшыктымо автомашинам чылаже 3 миллион теҥгелан налынна.
Шушаш ийыште шурно лектыш денат, шӧр лӱштыш денат тенийсе деч утларак кугу ошкылым ышташ шонена. Тидланже ялозанлык техникым умбакыже уэмден да пойдарен толман, кормам шукырак да сай качестваным ямдылыман, шкан утларак тыршен ыштыман. Вес йӧн уке, паша лектыш кӱшеш гына пашадарым кугемдаш да илышнам саемдаш лиеш.
Санденак пашаеҥна-влаклан ойлем: чылажат шкенан тыршымынам онча. Кумылда тугак нӧлтшӧ, паша верч йӱлышӧ лийже. Осал чер деч шекланыза, тазалыкдам аралыза. Илышда улан да пиалан лийже. У ий дене!
В.Л.Смоленцев,
«Восход» СПК колхоз председатель
