Ялозанлык паша куштылго огыл, но мом палемдыме, чыла ыштыме: у ялозанлык техникым налме, кормам ситышын ямдылыме, чапле лектышан шурным ончен куштымо, шӧр лӱштышым кугемдыме.
А шӧр – мемнан тӱҥ продукцийна. Тудын дене шкенан цехыштына тӱрлӧ кочкыш сатум – торыкым, сырым, ӱйым, кефирым да молымат – ямдылена да ужалена. Ужаленаже шкенан районышто веле огыл, республик мучко. Йошкар-Оласе кевытлаште гына 20 вере продукцийна ужалалтеш. Тыгак пошкудо Киров ден Татарстан кундемлашке сатунам колтена. Ончыкылык шонымашна – продукцийым утларак ыштен лукташ да ужалыме верым шукемдаш.
Сандене пашаеҥна-влаклан У ийыште кугурак лектышыш шуаш тыланыме шуэш. Лектыш кугурак лиеш – пашадарнат кугемеш, йӧннат ешаралтеш, налшат шукемеш. Сатум ыштыше ден налше кокласе кыл пеҥгыдырак лийже, ваш умылымаш ден пагалымашке шуаш вийна ситыже!
Г.Н.Михайлов,
«Галеон» ООО-н директоржо.