саламлымаш

У ий салам: КУЖЭҤЕР

Тений кугыжаныш велым полыш раш шижалте. Ончычак тыге лиеш гын, пашана утларак ушнен толеш ыле. Шӧрланат, пырчыланат  кумылаҥдыше ешартыш кугемын. Шӧрым сдатлыме акат тений кеҥежым утыжым иземын огыл. Идалык лектышан лийын: пырчым гектар еда 24 центнер дене налме, ушкалым 60 вуйлан ешарыме да 260 вуйыш шуктымо, шӧр лектыш кугемын — ӱмаште ик ушкаллан шотлымаште 6240 литрым шупшылмо гын, тений 6800 литр наре лийшаш. Техникым уэмденна – кугу куатан Т-150 ден К-525 тракторлам налынна.

Вес ийынат правительстве тыгак полшыжо ыле. Тунам вольыкна эшеат ешаралтеш,  йӧнна кугемеш да пашадарымат нӧлталын кертына ыле. Тыге ялысе пашаеҥынат кумылжо нӧлталтеш.

Озанлык пашаеҥ-влакым эн ончычак тенийсе идалыкым сайын эртарыме дене саламлем. Нуно, нелылыкым да эпидемийым ончыде, пашам тыршен ыштат. Кажне кечын, южышт – каныш деч посна. Таза лийышт, У ийыштат кумылышт нӧлтын шогыжо! Кугурак сеҥымашыш шуын толына гын, озанлыкна эшеат виянрак лиеш.

В.В.Таныгин,

«Тумьюмучаш» ООО-н директоржо

Опубликовать в Одноклассники

Добавить комментарий