21 сентябрьыште Морко районын депутат-влак погынымашыже черетдыме заседанийыштыже район администраций вуйлатышылан Александр Ивановым шогалтен.
Район вуйлатыше должностьыш тений августышто увертарыме конкурсышко А.Иванов деч посна шкеныштым тыгак вуйлатышын алмаштышыже Александр Александров, школышто туныктышо Эльвира Евгеньева, пашадыме Анатолий Муравьев темленыт. Нылытынат ончылгоч ойырен налме йыжыҥым эртеныт: конкурс комиссийын еҥже-влак дене мутланеныт, документым пуэныт.
Шолып йӱклымӧ почеш сеҥышыш А.Иванов лектын. Тудын верч эн шуко депутат йӱкым пуэн. Район погынымаш тудым район вуйлатышылан лишыл кок ийлан шогалтыме нерген решенийым луктын.
Александр Альбертович 2010 ий гыч Марий Элын культур, печать да калык-влакын пашашт шотышто министрын алмаштышыжлан ыштен, экономике вияҥмаш отделым вуйлатен. Озаҥысе финанс-экономике институтым тунем пытарен, республикысе Минфиныште ыштен, вара Морко районын финанс отделжым вуйлатен. Тений январь гыч Йошкар-Олаште Морко землячестве советын председательжын пашажым шукта.
41 ияш. Ватыже, кок йочаже улыт.
Ушештарена: районын ончычсо вуйлатышыже Сергей Григорьевым тений 2017 ий июльышто паша гыч жаплан кораҥденыт ыле. Амалже – корнышто автобус кумыкталтмылан кӧра шуко еҥын азапыш логалме верыш лекташ кӱлешлан шотлен огыл. Икмыняр жап гыч отставкыш каен. Тудын пашажым шукташ олмешыже Александр Голубков кодын ыле.
А.АНДРЕЕВ.
