УВЕР ЙОГЫН

У вуйлатыше дене палдареныт


Эртыше кугарнян, 7 апрельыште, РФ президентын Юл кундем федеральный округышто полномочный представительже М.Бабич Марий Эл Правительстве пӧртыштӧ, Конгресс полатыште, Кугыжаныш Погынын депутатше, правительстве член-влакым, республик ден федеральный министерстве, ведомство, ола ден район администраций вуйлатыше, мер организаций-влакын еҥыштым Марий Эл вуйлатышын объязанностьшым жаплан шуктышо А.Евстифеев дене палдарен.

Калык вашталтышым вуча

М.Бабичын палемдымыж почеш, Александр Александрович кеч-могай пашаштат кӱкшӧ профессионализм дене ойыртемалтын. Тудо ятыр жап юридический пашам шуктен. 2000-2002 ийлаште Юл кундем федерал округышто РФ президентын полномочный представительжын алмаштышыже лийын. Тугеже округ тудлан лишыл. Кок ий жапыште округысо чыла регион дене пашам ыштен, варажымат кылым йомдарен огыл, республикын социально-экономически вияҥме проблемыжым пала. Тылеч вара тудо Федераций Советыште ыштен, а 2004 ий гыч РФ Арбитражный судын ключевой направленийже-влакым вуйлатен. Чыла вере кӱкшӧ профессионализмым ончыктен.

М.Бабич ӱшан дене каласен: Александр Евстифеев тудын ончылно шындыме задачым, вуйлатыме, озанлыкым вӱдымӧ да политический опытшым кучылтын, сай лектыш дене шукташ тӱҥалеш.  Весымат палемден: пытартыш жапыште республикыште шуко ышталтын гынат, парымжат кугу, РФ Президентын майысе указше-влакат» огыт шукталт. Эртыше ийлаште сайлымаш кампаний жапыште палдырныше нарушений-влакат шеҥгелан кодшаш улыт. Лишыл сайлымаш «абсолютно вошт койшо» лийшаш да тудын «яндарлыкше» шотышто калыкын йодышыжо лекшашат огыл. М.Бабич палемден: Республикысе калык вашталтышым вуча. Тыште еҥ-влак пашам йӧратыше, добросовестный улыт. Тиде событий дене саламлем! Республиклан тиде пешак кӱлешан событий!

Мучашлан Михаил Викторович церемонийыште лийше кугыжаныш кучем орган ден верысе самоуправлений вуйлатыше, Марий Эл Кугыжаныш Погын депутат-влакым, вийым иктыш чумырен, А.Евстифеевлан полшаш ӱжын.

Александр Евстифеев Марий Эл вуйлатышын объязанностьшым жаплан шукташ ӱшанымылан тауштен да, Россий Президент В.Путинын ӱшанжым сулаш манын, чыла вийым пышташ шонымыжым каласен. Тидын годымак «Кызытеш нимогай программым темлаш ом тӱнал, тургыжланыше йодышым эн ончычак калык деч колнем. Шуктышаш задаче Российысе чыла регионышто тӱҥ шотышто икгаяк, но мыланна оксам шкан ышташ тунемман, тыгодым тудым кузе кучылтмо раш койшаш» манын ойлен. «Мыйын шонымаште, календарь да реальный йодмаш почеш илаш кӱлеш. Ончычак тиде — шошо ага, кудывече, корно, йоча сад йодыш-влак… Самырык-влакын эрласе кечылан ӱшаныш лийшаш  инициативыштым шыҥдараш полышым шижшаш улыт. Тунам нуно республик деч ӧрдыжкӧ каяш огыт тӱҥал. Ветерен-влакланат тӱткылыкым ойырыман. Нуно республиклан шуко ыштеныт, ятырынже кызытат тыршат, тидлан кугу тау.  

Кугу теме – образований. Кӱкшӧ качестван образований деч посна кадрат, сай паша верат огеш лий. Самырык-влак шочмо кундемышт дене кылдалтше лийшаш улыт», — палемден Александр Евстифеев, да чылаштымат пашам пырля ышташ ӱжын. 

Инвестицийлан корным почман

8 апрельыште А.Евстифеев рӱдоласе транспорт инфраструктур объектлаште лийын. Йошкар-Оласе аэропортышто чыла объект норматив йодмашлан келшен толеш. Предприятийын финанс йодышыжым решатлымеке, аэропорт пашам ышташ тӱҥалын кертеш. Тидын нерген аэропорт  директор А.Барадуля увертарен. Пашаеҥ-влак дене мутланымыж годым А.Евстифеев республикын экономикыжым вияҥдымаште транспорт инфраструктурым вияҥдымым кӱлешанлан шотлымыжым палемден:«Тышке толын шуаш неле гын, республикыш инвестицийым кузе вучаш лиеш?»

Тиде кечынак Александр Александрович кӱртньыгорно вокзалыште лийын, персонал да пассажир-влак дене мутланен. Тудо  санитар нормо, обслуживатлыме, объектым шотышто кучымо йодмаш пудырталтмым палемден. Вуйлатыше тыгак рӱдӧ пазарыште да оласе аптекыште лийын.

Илыме кумдыкым кӧ эрыктышаш?

Рушарнян, 9 апрельыште, А.Евстифеев Курыкмарий район ден Козьмодемьянск миниципальный образованийыште экономический потенциалым да социальный сферым аклен. Вуйлатышышт-влак дене капитально олмыктымо, коммунал озанлык да бизнес-структур дене кыл йодышым каҥашен да Сеҥымаш кечылан ямдылалтмылан, йоча-влакын кеҥеж канышыштлан, шокшым пуымо тургымым иктешлымылан тӱткышым ойыраш кӱштен.

Верлаште пагыт еда кумдыкым эрыктыме йодыш критический состоянийыш шуын. Палемдымыж почеш, пӧрт воктене, тӱшкан пайдаланыме верлаште арулыкым коммунал службо, управляющий компаний, озанлык субъект, тыгак зданий ден пӧрт-влакын озашт кучышаш улыт. Раш, тидлан ешартыш бюджет окса огешат кӱл. «Порядке лийже манын, «субботник» манмым илышыш пуртыман, но тиде ик гана эртарыме мероприятий огыл, а кажне кечын ыштышаш паша лийшаш. Республикысе кажне еҥ ару олаште але поселкышто илынеже», — иктешлен А.Евстифеев.

Тудо тыгак Козьмодемьянск портышто лийын, районысо рӱдӧ эмлыверын поликлиникыжым чоҥен шуктышаш, ончыкыжым тыште сосудистый рӱдерым почмо йодышым тарватен. А.Евстифеев Кулаково селаште школым чоҥымо паша, ялысе калыкын илышыж дене палыме лийын.

С.Пехметова.

Снимкылаште:

(Фотом Марий Эл вуйлатышын мер кыл да увер управленийже гыч налме.)

                                                                                                                                    

Опубликовать в Одноклассники