Марий Эл Республик ялозанлык да продовольствий министрын алмаштышыже А.В.Кондратенко да кундемнан эше икмыняр еҥже 5-7 июльыште Липецк областьыште эртыше Россий кӱкшытан Пасун кечыштыже ончыл технологий, паша опыт дене палыме лийыныт.
Мероприятийыш элнан 67 регионжо гыч 300 утла компанийын пашаеҥже погынен. Пасун кечыже – агропромышленный комплексыште тыршыше-влаклан ончыл технологий, пайдам кондышо опыт дене палыме лияш сай платформо. Толшо-влаклан тематический секций-шамыч пашам ыштеныт, адакшым кажныжлан шке шонымашым «йыргешке ӱстел» йыр погынымо годым каласаш йӧн лийын.
6 июльышто Россий Федерацийын ялозанлык министрже Д.Патрушев «Шурным поген налме паша да кушкылым ончен куштымо отрасль вияҥме стратегий» теме дене конференцийым эртарен. Тушто эн шукыжо тенийсе шурным поген налме, ялозанлык производитель-влакын техникышт нерген мутланеныт.
«Мемнан задаче – шурным писын да уто роскот деч посна поген налаш. Садлан чылажат сайын организоватлыме лийшаш. Тений ялозанлык производитель-влаклан пасу пашам эртараш полшаш федерал бюджет гыч регионлаш чылаже 90,2 миллиард теҥгем колтымо, – палемден министр. – Шкат паледа, тений йӱлышӧ да шӱрымӧ материаллан ак палынак кӱзен – ялозанлык отрасльлан роскот ешаралтын». Конференцийыште министр тиде оксам пӧртылтымӧ нерген ойлен.
Марий Эл Республик гыч мийыше делегаций моло участник дене пырля кушкылым ончен куштымаште, вольыкым ашныме пашаште у сату да технологий, тыгак кызытсе жаплан келшыше да йӧнан технике дене палыме лийын.
Г.Кожевникова.
