Марий Элын Тазалыкым аралыме министерствыжын 7 сентябрь эрдене увертарымыж почеш, пытартыш суткаште республикнан инфекционный стационарлаж гыч улыжат 1 пациентым мӧҥгӧ колтымо, тыгодымак 28 черлым эмлалташ пыштыме. Тыге, теҥгече эрдене регионын шым эмлымверыштыже 416 еҥ киен. Ты чот гыч 409 черле «пневмоний» дене орланен, 109 пациент — COVID-19 инфекций дене. 135 черле неле состоянийыште лийын, 7 пациент шодым искусственно вентилироватлыме йӧн дене шӱлен, 188 еҥ – кислород полшымо дене.
«Коронавирус: статистика» сайтын 7 сентябрьысе данныйже почеш, Марий Элыште пытартыш суткаште у коронавирус инфекций дене черланыме 16 у случайым регистрироватлыме, да тиде чот ынде 4375 цифр марте шуын. Пандемий пагытыште COVID-19 инфекций деч 41 черле колен.
М.ИВАНОВА
