У ий деч ончыч Марий Элын Молодежный политике, спорт да туризм министерствыжын коллегийжын заседанийже эртен. Тушто Марий Эл правительстве председательын икымше алмаштышыже Михаил Васютин, министр Лидия Батюкова лийыныт. Тӱҥ шотышто кодшо ийын лийше сеҥымаш да тургыжландарыше йодыш-влак нерген мутланеныт.
Кодшо ий Волонтерын идалыкше семын эртен. Тидын шотыштак республикын кок проектше сай лектышым конден. Волжск оласе «Счастливый билет» волонтёр отрядын эсогыл кок проектше «Российын доброволецше-влак- 2018» всероссийский конкурсын финалышкыже лектын. Йошкар-Оласе Самырык-влакын полатыштын Волонтёр пашам вияҥдымаш рӱдерже Российысе эн сай лучко отряд радамыш лектын да 200 тӱжем теҥгеаш грантым сеҥен налын. Республикысе волонтёр-влак радамыш чылаже 45 тӱжем еҥ ушнен.
Самырык-влакын тӱҥалтышыштлан полышым пуымыланат кугу вер ойыралтеш. Марий Эл вуйлатышын патронажше почеш «Ончыко да кӱшкӧ» самырык-влакын форумышт эртаралтын. Тидлан кӧра ӱдыр-рвезе-влак Россий кӱкшытыштӧ эртаралтше форум кампанийыш чолган ушненыт. Тудын участникше-влак Россий Президентын грант конкурслаштыже 2 миллион теҥгеаш грантым сеҥен налыныт, а самырык мер ушем-влак — 4 миллион утла теҥгеашым.
Физический культур ден спортым вияҥдымаштат сеҥымаш лийын. Марий Эл ден РФ Спорт министерстве коклаште пашам ваш келшен ыштыме шотышто ойпидыш ышталтын.
Икымше гана республикыште Марий Эл Правительствын грантшым физический культур да спорт областьыштат коммерческий огыл организаций-влак сеҥен налыныт. Грант кугыт 2 миллион теҥгеш шуын. Тидлан кӧра сай лектышым пуэн кертше проект-влакым илышыш шыҥдараш йӧн лектын. Регионысо спорт федераций-влак Президент грант конкурслаште участвоватлымылан кӧра тыгак 2 миллион теҥгеаш проектлан шийвундо полышым налыныт.
2018 ийыште республикын спортсменже-влак тӱрлӧ кӱкшытан таҥасымашлаште шке вийыштым тергеныт да 278 медальым сеҥен налыныт, 24 еҥ Росийысе сборныйлаш логалын. Корта базыште ечыроллер трассыште ынде пычкемыш годымат лӱдде кошташ лиеш.
Туризмат сайын вияҥеш. Кодшо ийын республикыш 700 тӱжем наре турист ден экскурсант толын. Вес ийынат тудын чотшым кугемдаш тыршаш тӱҥалаш палемдыме. Тидын шотыштак Марий Эл вуйлатыше 2025 ий марте республикысе туризмын вияҥме стратегийжым пеҥгыдемден.
Кодшо ийын республик «Мыйын Россий» йоча туризымым вияҥдыме национальный программыш ушнен.
Федеральный кӱкшытыштӧ регионышто событийный туризмым вияҥдыме пашам кӱкшын акленыт. Марий Эл ты шотышто «Ший лиге» национальный рейтингын 30 эн сай событий радамышкыже логалын. «Куштылго еҥ-влак» южышто ийын коштмо фестиваль «Российын событийже-влак» всероссийский премий фестивальын финалышкыжат шуын. «Бендериаде» событийный туризм конкурсышто ойыртемалтын. Сувенир сатунат тӱрлӧ конкурсышто эреак сеҥыше семын палемдалтеш.
Кодшо ийын республикысе туризмым вияҥдаш 2 миллион теҥге наре грант оксам кучылтмо. Вес ийын Марий Эл Республик вуйлатышын грантше кӱшеш Морко районысо Унчо селаште Турист-увер рӱдер почылтшаш, вет тудым финн-угор тӱнян тӱвыра рӱдыжлан шотленыт.
Заседаний годым министерствын вес ийлан ыштышашлык паша радамжым рашемденыт. Тидын шотыштак республикын турист порталжым почшаш улыт. Кеҥежым инвалид-влакын спартакиадышт лийшаш. Тушко Российын 65 регионжо гыч 2500 участник толшаш. Тиде жапыштак Ий полат негызеш Н.И.Шалагин лӱмеш Спорт тоштерым почаш палемдыме.
Заседаний годым ятыр спортсменлан Российын спорт мастерже лиймым пеҥгыдемдыше пале ден удостоверенийым кучыктеныт, ойыртемалтше-влакым палемденыт.
С.Носова.
