Т.Евсеев лӱмеш национальный тоштерыште «Марий Эл Республикын историй да тӱвыра памятникше-влак» фотоончер почылтын.
Тушко чылаже 42 фотосӱретым чумырымо. Кажныштыже кундемнан ты але вес шарныктышыжым уэмден олмыктымо деч ончычсым да варасым ужын кертына. Нине фотосӱретым Историй да тӱвыра памятник-влак дене пайдаланыме да аралыме научно-производственный рӱдерын пашаеҥже Александр Хват ямдылен. Ончыч тудо кужу жап Марий Элысе Тӱвыра поянлыкын объектше-влакым оролымо, пайдаланыме да аралыме шотышто управленийжым вуйлатен. Таклан огыл 2010 ийыште РФ Тӱвыра министерствын «150 лет учреждения органов охраны памятников истории и культуры» юбилейный медальже денат палемдалтын.
Александр Иванович фотопашалан шукертак кумылаҥын. Ончержат икмыняр гана эртаралтын. Но тидыже поснак ӧрыктарыше. Ме тудын гоч ты рӱдерын паша лектышыжым шке шинча дене ужын кертына.
Ончерым почмаш деч вара республикысе шарныктыш-влакым арален кодымо йодышлан пӧлеклалтше «йыргешке ӱстел» эртен. Тушко Марий Элын Тӱвыра, печать да калык-влакын пашашт шотышто министерствын, научно-производственный рӱдерын специалистше-влак толыныт ыле.
С.Носова.
