Марий Элыште утларак ямде улмо режимым 27 сентябрь марте шуйымо.
Тыгай вашталтышым регионым вуйлатыше Александр Евстифеев «Республикыштына у коронавирус инфекций (СOVID-19) шарлымылан кӧра калыклан сай санитарно-эпидемиологический илышым ыштыме шотышто мере-влак нерген» указыш 4 сентябрьыште пуртен.
Документ дене келшышын, утларак ямде улмо режим 27 сентябрь йотке шуйна. Тыгеже, маске режимат вийыште кодеш: зданийыште, сооруженийыште, оралтыште, тӱшка транспортышто, кӱртньыгорно транспорт инфраструктурын объектыштыже, пассажир ден багажым заказ почеш шупшыктышо легковой таксиште, транспорт средствыште шӱлымӧ орган-влакым аралыме средствылам чийыман; тыгак шуко калыкым погышо южо мероприятийым эртараш чарыме.
Ушештарена, кызыт республикна — чаракым кораҥдыме кумшо йыжыҥыште. Августышто сатум розницыш ужалыше объект-влак кумдыкын кугытшо ден иканаште обслуживатлыме калыкын чотшым шотыш налде пашам ышташ тӱҥалыныт. Турист компаний, театр ден концерт организаций, монча ден сауно-влак угыч омсаштым почыныт. Унагудо-шамыч тичмаш куатын пашам ыштыме режимыш кусненыт.
У коронавирус инфекциян пациент-влаклан полышым пуышо медицине пашаеҥ-шамыч республикнан ик эн сай санаторийыштыже канат да тазалыкыштым пеҥгыдемдат.
Марий Элым вуйлатышын организаций да
аналитике виктемжын уверже негызеш
М.ИВАНОВА ямдылен
