Калыкын поснак пытартыш жапыште шкем эскерыдымыже арам ыш эрте: Роспотребнадзорын Марий Элысе виктемжын увертарымыж почеш, 9 июньышто Марий Элыште у коронавирус инфекций дене черланыме 47 у случайым регистрироватлыме, да пандемий тӱҥалме пагыт гыч таче кече марте тиде чот 2151 еҥыш шуын.
COVID-19 дене республикнан кажне районыштыжо черланеныт, но поснак шукын – Йошкар-Олаште (1125 еҥ, але чумыр чот гыч 52,3%), Медведево районышто (262 еҥ/12,2%) да Волжскышто (169 еҥ/7,9%). Нине кум «лидерым» Советский (83/3,9%) ден Курыкмарий (71 еҥ/3,3%) район-влак поктат.
Черланыме чот тӱҥ шотышто шоҥгыеҥ (20%) ден илалше (31,5%), тыгак пашам ыштыше калык (30%) кӱшеш кугемеш.
Чер утларакше еш кӧргыштӧ, лишыл еҥ-влак коклаште талышна – тыгай радамыш 1189 гражданым (55,3%) пуртымо. Кондымо случайын чотшо 147 (6,8%) марте шуын.
У коронавирус инфекций дене черланыше-влак кокла гыч пелыже наре (980 еҥ/45,6%) черым куштылгын эртарат, чырык ужашыже (540 еҥ/25,1%) – кокла нелылык дене, кажне латвизымше черле (138 еҥ/6,4%) – нелын. 493 еҥ черланымыжым шижын огыл гаяк.
Эпидемий тӱҥалме пагыт гыч таче кече марте республикысе кок лабораторийыште коронавирусан черле-влакын да нунын дене кылым кучышо-шамычын 48441 биоматериалыштым тергыме.
Кызыт эпидемиолог-влакын учётыштышт 1515 еҥ шога. Ты чот гыч 1503 граждан коронавирусан черле але инфицироватлалтын кертше еҥ дене кылым кучен, 12 еҥ регионышкына йот эл але Российын вес регионжо гыч пӧртылын. 9975 еҥым учёт гыч кораҥдыме.
Марий Элын Тазалыкым аралыме министерствыжын палдарымыж почеш, таче республикын инфекционный стационарлаж гыч 40 еҥым мӧҥгӧ колтымо, тыгодымак 56 черлым эмлалташ пыштыме. Профильный койкылаште чылаже 594 пациент кия. Ты чот гыч 266 еҥлан «у коронавирус инфекций» диагнозым шындыме. 161 еҥ неле состоянийыште. 10 черле шодым искусственно вентилироватлыме йӧн дене шӱла. 261 пациентлан кислород кӱлеш. Латкуд еҥ колен.
М.ИВАНОВА
