УВЕР ЙОГЫН

Тул нигӧм да нимом ок чамане

Электротул дене кылдалтше амаллан кӧра тӱҥалше пожарыште тений республикыште 7 еҥ колен, нунын кокла гыч кокытшо – йоча, 11 еҥ сусырген, палдара РФ МЧС-ын Марий Элысе Тӱҥ управленийже.

— Игече йӱкшемдымылан кӧра шукын ырыктыше электроприборым чӱкташ тӱҥалыт. А тыге гын, электровоштырлан кугу нагрузко ышталтеш. Тудын тоштеммыжлан да кужу жап чӱктен шинчыктымылан кӧра кӱчык замыканий лийын да тул ылыжын кертеш. Тошто пӧртлаште электровоштырат тоштемше, сандене тыгай илыме верлаште тудо кугу туткар марте шуктен кертеш. Вес амалже – электронагревательный прибор-влак дене пайдаланыме годым пожар лӱдыкшыдымылык правилым шуктыдымаш. Еҥ-влак тудым терморегулятор деч посна, почылтшо эрыкытыше элемент-влак дене кучылтыт. Тидыже воктене улшо материалым чот ырыктен да ылыжме марте шуктен кертеш. Сандене тыгай прибор-влакым эскерыде кодаш огеш лий. Чӱктымӧ годым йымакыже вашке йӱлаш тӱҥал кертдыме кӱжгӧ подставкым пыштыман, — палдара Марий Элысе кугыжаныш тулазап ваштареш шогышо службын виктемжын вӱдышӧ специалистше Татьяна Самигуллина.

Тыгак электричестве дене кылдалтше пожар-влак еҥ-шамычын электровоштырым тергаш специалистым ӱжаш кумылан огыл улмыштлан кӧра тӱҥалыт.

Эше ик амал – коммунал услугылан тӱлыдымаш. Парыман-влакым электричестве деч посна кодат. Тыгай годым шукынжо ыраш, кочкышым шолташ пӧлемыштышт але пачерыштышт тулым кучылтыт. А тидыже моткочак вашке пожар марте шуктен кертеш. Тудыжо парыман-влаклан веле огыл, нимо дене титакдыме пошкудыштланат эҥгекым ышта. Тыгай еш-влакым посна контрольыш налыныт да Марий Элысе УГПС-ын специалистше-влак пожар лӱдыкшыдымылык нерген профилактике мутланымашым моло-влак дене таҥастарымаште нунын дене чӱчкыдынрак эртарат.

Л.КАМАЛЕТДИНОВА

Опубликовать в Одноклассники

Добавить комментарий