САМЫРЫК ТУКЫМ

Театр – чонышто…

Шукерте огыл Россий мучко студент-влак кидышкышт вучымо дипломым кучышт. Мемнан тачысе лаштыкнан унажат, Морко район Шордӱр ӱдыр — Надежда Назарова, ынде кумшо гана выпускник. Ончыч тудо Палантай лӱмеш тӱвыра да сымыктыш колледжыште «Курчак театрын актёржо», вара Марий кугыжаныш университетын Калыкле тӱвыра да тӱвыра кокласе коммуникаций институтышто «Этнокультур рӱдер вуйлатыше» специальностьлам налын. А ты кечылаште Чебоксар кугыжаныш университетыште «Кугыжаныш да муниципал управлений» магистр дипломым кучыктеныт.
      — Студент пагыт ынде шеҥгелан кодо, но тудо ӱмырешлан ок мондалт. Келшет?
      — 9 ий студент лийынам. Колледжын, университетын мер илышышкыже эреак ушнен шогенам. Волонтёр пашам шуктенам, научный шымлымаш-влак дене конференцийлаште вием тергенам. Мылам Шупашкар ола пеш келша, садлан МарГУ деч вара шинчымашым налаш тушко кусненам.
      Икымше дипломем огыл гынат, магистр пашам аралыме годым моло деч чот тургыжланененам. Шымлымашем «Тӱвыраш вашталтышым пуртымо процессым вуйлатымым уэмдымаш» маналтеш. Культур деч вара экономике специальностьыш куснаш неле ыле. Туге гынат тӱвыра йырак «пӧрдынам». Вет тиде кок алан (тӱвыра да экономике) кылдалтыныт.
      — Надя, 2012 ийыште лекше «Олык марий-влакын кавасе ватышт» художественный фильмыште, 23 ӱдыр гыч иктыжын рольжым тый  модынат…
      — Республикысе курчак театрыште пашам ыштем ыле. Мемнан деке репетицийыш фотом ышташ ӱдыр толын. Икмыняр кече гыч мылам пӱтыралыныт, лишыл кечылаште съёмко лиеш маныныт. Художественный сӱретын изи ужашыштыже коям, тушто Оштылеч улам.
Иктаж киношто сниматлалташ кумыл уло. Палем, вийым пыштем гын, шонымашем шукталтеш.
       — Илышет театр денак кылдалтын?

— Пандемий деч ончыч «Седьмой лепесток» курчак да «Чебоксар Камерный» частный театрлаште тыршенам. Мылам модашат, репетицийыш кошташат пеш келшен.
«Камерный театрыш» Белгород ола гыч ГИТИС-ым тунем пытарыше режиссёр Оксана Погребняк толын ыле. Мемнан дене тудо кок спектакльым, «Толын пӧръеҥ ӱдырамаш деке» да «Наташын шонымашыже», шынден.
     Ты театрыште икымше рольем — «Ваш йӧратыше-влакын лӱмдымӧ погынымашышт» сӱретыште. Тудым самырык режиссёр Кирилл Корсаков шынден. Тудак «Команда» спектакльлан актёр-влакым ямдылаш тӱҥалын, но мучашлен шуктен огыл, уста рвезым армийыш наҥгаеныт. Пашажым вес тале специалист Юлия Касаева шуен.
     Йошкар-Олаш гастроль дене толаш шонымаш уло ыле. Но театр-влак петырнышт.

Театрлан кӧра шкемым кӱлешан еҥла шижам. Персонажын илышыжым ончыктымем годым сай пашам ыштем манын ӱшанем. Кунам спектакль еҥым тургыжланаш тарата, у шонымашым «шочыкта», шкенжын илышыжым вес могыр гыч ончалаш йӧным пуа тиде актёрлан эн шерге.

Спектакльлаште Морко ӱдыр тӱҥ рольым модеш. Пандемий эртыме деч вара Надям Йошкар-Оласе афишылаште ужына манын ӱшанен кодына.

О.МОШКИНА

   

         

Опубликовать в Одноклассники

Добавить комментарий