КУЛЬТУР ДА ИСКУССТВО

«Тау пӱрымашемлан»

25 январьыште М.Шкетан лӱмеш Марий национальный драме театрыште «Марий Эл» ансамбльын солистше, Российын сулло артистше Зоя Берникован концертше лиеш.

Зоя Васильевнан йоҥгалтарыме кажне мурыжо шӱмыш логалеш, ушеш возеш, а яндар да виян йӱкшӧ торашке шергылтеш. Тудын мастарлыкшылан тауштен, Марий кундемыштына веле огыл, Российыштат да йот эллаштат илыше-влакат  совым кыреныт. А чон гыч лекше муро аршаш гоч тудо марий калыкнан тӱвыраже, йӱлаже, кундемнан поянлыкше, моторлыкшо  нерген палдара.

Концертым могай амал дене эртара? Молан лачшымак тудым «Тау пӱрымашемлан» манын лӱмден? Нине да моло нерген шкеж дене мутланышна.

Зоя Васильевна, могай амал дене тиде кечын концертым эртареда?

— 25 январь — мыйын шочмо кечем, но ала-могай амаллан кӧра паспортышкем 22 числам возымо. А такшым эреак 25 январьыште, йолташ, родо-влак дене пырля пайремлаш чумыргена. Сандене концертланат тиде кечым ойырен налаш келшен толын.

Сценыште Те нылле утла ий улыда. Тиде жапыште шуко неле-йӧсым чыташ, тӧрсыран корным эрташ логалын. Санденак, очыни, концертдамат «Тау пӱрымашемлан» манын лӱмденда?

— Икмыняр ий ончыч семмастар Лилия Алексеева Вячеслав Комаровын «Тау пӱрымашемлан» почеламутшылан семым возен. Тиде мурым моткоч йӧратем да тудо калыкланат келша. Почеламутышто илыш нерген моткоч чын  возымо. Адакшым тыняр ий чон йодмо пашам шуктымеке, пӱрымашланат тауштыде огеш лий. Кодшо ий мучаште, октябрьыште, «Российын сулло артистше» лӱм дене палемдалтым. А ты гана куанем ончаш толшем-влак дене пайлынем. Концертыште «Марий Эл» кугыжаныш куштышо ансамбльын да «Марий кундем» калык семӱзгар оркестр-влакын шоктымышт почеш марий да руш муро-влакым мураш тӱҥалам, тыгак йолташ-шамычат мастарлыкышт дене куандарат.

У муро-влакымат ямдыледа?

— Ямдылем, но тиде концертлан огыл. Ончыкыжым сольный концертым эртараш шонем, сандене кызыт репертуарем у муро дене пойдарыме паша ышталтеш.

Россий награде дене палемдалтмеке, могай шижмаш чондам авалтен?

— Куан. Тыгодымак «Илышетлан ит ӧпкеле» муро вуйышто пӧрдын, йоча, самырык пагытат ушышкем толын пурен. Лач тунам муро тӱняш икымше ошкылым ыштенам. Шарнем, изиэм годым авамын шуйдарен мурымо мурыжым,  пӧрт воктенысе ломбыш кӱзен шинчын, мураш йӧратем ыле. Кидыште Россий награде уло гынат, сценыш лекме деч ончыч молгунамсе семынак тургыжланем, шӱм кӱлтка, вет кажне гана икымше да пытартыш семын калык ончыко лектат.

Муро дене икте оксам ышта, весе тудын полшымыж дене шуко йолташым муэш. А Тыланда мо тудо?

— Эмлан шотлем. Муро шкендым веле огыл, вес еҥымат куандарышаш да эмлышаш, илаш вийым пуышаш. Сандене сценышке мый кертам манын огыл лекман, а весын чонышкыжо могай-гынат тамгам кодаш тыршыман.

 

Алевтина БАЙКОВА мутланен

Фотом еш альбомжо гыч налме

Опубликовать в Одноклассники

Добавить комментарий