Марий Эл Правительстве пӧртыштӧ эртыше пресс-конференций лач тиде йодышлан пӧлеклалтын ыле.
Тений Кугу Отечественный сарыште сеҥымылан 73 ий темеш. Марий Эл правительстве председательын алмаштышыже Степан Воронцовын палемдымыж почеш, Йошкар-Олаште чылажат молгунамсе семынак эртышаш. 4 майыште Кугу Отечественный сарын участникше-влак самырык-влакын толкыныштын ончылъеҥже-влак дене вашлийыт. 9 майыште эрдене Марково шӱгарлаште иза-шольо шӱгар ӱмбаке да мемориал воктеке, тыгак Сеҥымаш паркыште Тылын труженникше-влаклан памятник воктеке пеледыш аршашым пыштат.
А 9 шагатлан рӱдӧ каныме паркысе Воинын чапшылан монумент воктене митинг эртышаш. Вара тушко да Курымашлык тул воктеке пеледыш аршашым пыштат.
11 шагатлан Оболенский-Ноготковын площадьыштыже парад тӱҥалеш. Ракетный дивизий командирын алмаштышыже Сергей Александровын ойлымыж почеш, тудлан ямдылалташ тӱҥалме. 20 апрель гыч парад эртарыме верыште тренировко-влак тӱҥалыт. Тыгай тренировкыжо 23, 25, 27 апрельыште эртат. 4 да 7 майыште генеральный репетиций-влак лийыт. Тушко военный техникымат кондат. Сандене нине кечылаште оласе уремлам петыркалат.
Тений парадыште ракетный дивизийын 800, силовой структурын 600 еҥышт да общеобразовательный школла гыч 300 наре кадет участвоватлаш тӱҥалыт. 12 военный техникым ончыктат. «Тополь», «Ярс» ракет комплекс-влакын образецыштым, «БТР-8» бронетранспортёрым ужаш йӧн лиеш.
Торжественный эртымашым саркурал дене строевой приём-влакым ончыктышо подразделений мучашлышаш. Вара «Бессмертный полк» акцийыш ушнышо-влак тарванат. Самырык-влакын тӱҥалтышыштым вияҥдыме рӱдер вуйлатыше Лариса Лоскутован палемдымыж почеш, кодшо ийын Йошкар-Олаште ты акцийыш 8,5 тӱжем, а республик мучко 22 тӱжем еҥ ушнен. Тений тудын радамже эшеат кугурак лийшаш. Акцийыш ушнышо-влак коклаштак куд вере театрализоватлыме представлений-влакым ончыкташ тӱҥалыт.
Апрель мучаш гыч тыгак молгунамсе семынак Георгиевский тасмам пуэдат.
Йошкар-Ола мэр Евгений Масловын ойлымыжо почеш, 26 апрельыште «Шарнымаш вахте» патриот акций тӱналеш. Тачысе кечылан тушко тӱжем наре волонтёр ушнаш кумылым ончыктен. 9 майыште кече мучко паркыште пайрем мероприятий-влак лийыт: «Шарнымаш сорта» акций, «Салтак пучымыш», пайрем концерт да молат. Сенымаш кече лу шагат кастене тулсавыш дене мучашлалтеш.
Весымат палемдыман, тений регион вуйлатыше А.Евстифеевын темлымыж почеш Йошкар-Олаште эртыше мероприятийлаш районла гычат уна-влакым ӱжаш палемдыме.
С.Носова.
