Кодшо кечылаште полицийыш Шернур районысо ик ялыште илыше 22 ияш самырык еҥ йыҥгыртен да 189 тӱжем теҥге оксаж деч посна кодмыж нерген каласен.
Ойлымыж почеш, тудо тракторым налаш тарванен да увертарымашым яра вераҥдаш лийме ик сайтыште келшен толшым муын. Акшат шулдын чучын – 189 тӱжем теҥгем веле йодыныт. Тыге рвезе «ужалыше» дене кылым ыштен да ты техникым налаш шонымыж нерген каласен. Садыже тракторлан оксам счетышкыжо колташ йодын. Тудо кӱштымым шуктен, но тылеч вара ни тракторым, ни оксажым ужын огыл, вет «сатулан» тӱлымӧ деч вара «ужалыше» увертарымашым кораҥден да кылым кӱрлын.
Мошенник-шамычын оптышышкышт логалаш огыл манын, полиций пашаеҥ-влак ужалыме-налме пашам вашлиймеке гына шукташ да сатулан оксамат тудым налмеке але мӧҥгышкӧ намийымекышт гына тӱлаш темлат.
Л.КАМАЛЕТДИНОВА
