2-12 мартыште Красноярскыште студент-влак коклаште теле универсиаде эрта. Тыгайже элнан историйыштыже икымше гана.
9 мартыште Красноярскыште, теле универсиадыште ӱдыр-влак эстафетым (3Х5км) куржыныт. Нунын коклаште – Марий Эл гыч Е.Смирнова лийын. Стартыш 13 команде лектын. Икымше верыште Российын командыже, кокымшышто Японийын, кумшо верыште Италийын сборныйышт шогеныт.
Эстафете кум этап дене эртен. Ӱдыр-влак 5 километрым классике йн дене куржыныт. Икымше этапыш Алиса Жамбалова лектын, ончылно лийын. Эрден эрак лум луммылан да трассе шӱкшӱлан кӧра чыланат, манаш лиеш, начарынрак куржыныт. Кокымшо этапым Екатерина Смирнова налын. Тудо ончыл верым арален коден. Кумшо этапыште бронзо призёр Яна Кирпиченко чымалтын. Тудо шке результатше деч минут наре почеш кодын. Почешыже финке Эмми Лапса каен, но варажым тудым японко ден итальянке эртеныт.
Икымше этапым куржшылан, мутат уке, пеш неле лийын. Йол йымалне лумжо пуйто «шолын»…
– Трассе мучко ончаш толшо-влакын тургыжланен кычкырымышт вийым пуэн, – палемден Японий гыч ечызе.
11 мартыште ӱдыр-шамыч тӱшка стартыш лектыныт, 15 километрым куржыныт. Россий гыч ечызе-влак адакат ты радам денак пьедесталыште лийыныт: икымше Я.Жамбалова, Е.Смирнова кокымшо, кумшо – Я.Кирпиченко. Екатеринам икымше вер деч улыжат 1,1 секунд ойырен.
Е. Эшкинина.
