10-12 августышто Юл кундем кугыжаныш технолгий университетын Яльчик ер серысе «Политехник» каныме базыштыже Российысе журналист ушемын Марий Эл пӧлкажын фестивальже эртен.
Тений тудо футбол дене тӱнямбал чемпионат темылан пӧлеклалтын. Санденак тӱҥ мероприятий-влак спорт дене кылдалтыныт: футболлат модыныт, шке вий-куатыштымат, уш-аклыштымат тергеныт. Но журналист-влак тугакшат творческий шӱлышан улыт. Веселан да пайдалын каныме дене пырля нуно шкеныштын профессиональный мастарлыкыштым нӧлташ полшышо мероприятий-влакымат эртареныт, шинчымашыштым пойдареныт. Мутлан, тений национальный теме дене кылдалтше материалым кузе возаш, тӱшка калык ончылно шкем кузе кучаш тунемыныт. Тидлан филологий науко доктор Любовь Абукаева туныктен.
Эшежым ты фестивальым журналист-влаклан пырля вашлийын, лишкырак палыме лийме, тургыжландарыше йодыш-влакым каҥашыме, тӱняумылымашым пойдараш полшышо площадке семынат аклаш лиеш. А тений журналист-влак дене вашлияш Россий Кугыжаныш Думын депутатше Сергей Казанковат миен. Тудо почмо ик социальный сетьыште тудын нерген палемден: «Мыланем тиде вашлиймаш моткоч пайдале лийын. Таклан огыл журналист-влакым нылымше кучемлан шотлат». Тыгак РФ Национальный банкын Марий Элысе пӧлкажын пресс-секретарьже Эльвира Нуреева дене «йыргешке ӱстел» пайдале лийын.
Молгунамсе семынак йӱла почеш фестивальын флагшым нӧлталыныт да волтеныт, редакций-влакын пашашт нерген фильмым онченыт, ушем радамыш у журналист-влакым пуртеныт, шочмо кечым палемдыше-влакым саламленыт. Модын колтыдымо лотереят кумылым нӧлтен. Журналист ушем вуйлатыше Оксана Старикован «Дачники» у книгаж дене палдарымаш эртен. Чылалан Йошкар-Оласе «Киноверсия» группын концертше келшен.
С.Носова.
