Тений икымше пелийыште Роспотребнадзорын Марий Элысе управленийже кол продукций дене кылдалтше пашам виктарыше 160 объектым терген. Нунын кокла гыч 151 – ужалыше предприятий, 9 – общественный питаний предприятий.
Тергымаш жапыште лабораторный шымлымашым эртараш 53 тӱрлӧ сатун пробыжым налыныт. Иктешлымаш ончыктен: нуно чыланат нормо йодмашлан келшен толыт.
Тыгодым 72 предприятийыште законодательствын йодмашыжым пудыртымо палдырнен. Тиде амал дене должностной ден юридический лица-влакын административный правонарушенийым ыштымышт нерген 42 делам тарватеныт. Чылаже 38 административный штрафым тӱлыкташ палемдыме. Нунын чумыр кугытшо 463,9 тӱжем теҥгешке шуэш.
Келшен толшо документ лийдымылан да сатун срокшо лекмылан кӧра 17 партий кол продукцийым ужалымаш гыч кораҥдыме.
Л.Камалетдинова.
