Москвасе АИЖК (Илыме верым чоҥаш ипотечный кредитым ойырышо агентстве) илыме верым чоҥышо «Союз» кооперативлан Йошкар-Олаште коттедж сынан 12 шке пӧртым нӧлташ, тыгак нунын пелен участкан 1,6 гектар мландым яра пуа. Ты кумдык Йошкар-Олан рўдӧ верже деч 7,2 меҥге тораште, Мышино ял воктене, верланен. Кўлеш социальный инфраструктур: йочасад, школ, поликлинике — 2,5 километр лишне верланат. Участке ныл ийлан пуалтеш. Кугыжаныш полыш кўшеш мланде участкым яра пуымаш да пӧртлам эн изи роскот дене чоҥымаш еҥ-влаклан илыме верым моло тыгаяк объект дене таҥастарымаште рынке ак дене шотлымаште 25 процентлан шулдынрак налаш йӧным ышта.
АИЖК — илыме верым чоҥышо кооператив-влаклан федеральный собственностьышто улшо мланде участкым шуко пачеран пӧртлам, шкалан сурт оралтым, моло тўрлӧ илыме верым, инфраструктур объектлам нӧлташ оксам тўлыде пуышо организаций. Тыге кооператив член улшо еҥ-шамычын оксашт чоҥымо дене кылдалтше роскотым петыраш гына кая. Кызытсе жапыште мланде участкан лияш але тудым арендыш налаш шерге, а у йӧн оксам ятырак аныклаш полша. Эшеже кооперативыш ушнышо-влак проектым ямдылыме пашалан могай роскот ышталтмым да чоҥымо паша кузе кайымым шкештак терген-эскерен кертыт. Тыге уто роскот деч утлат.
Федеральный мланде участкым кучышо-влак тудым илыме верым нӧлташ яра утларак ойырат гын, шуко еҥ пӧртан лийын кертеш ыле.
А.АНДРЕЕВ.
