ЕШ ДА ИКШЫВЕ

Родо-тукым — вий

Шукерте огыл Марий Турек поселкысо «Эрвел» кафеште Коновалов-Аксёновмытын тукымвож вашлиймашышт эртыш. Пайремым юмылан пелештен тӱҥальыч. Ты йӱлам Районысо «Ошмарий-Чимарий» юмыйӱла  общинын вуйлатышыже Григорий Иванов шуктыш.  Умбакыже пайремым Роза Рябчикова ден Ольга Эльтемерова шуеныт.

Тыге пырля чумыргымо годым уке улшо родо-тукымым шарналтыде ок лий. Сандене тошто марийым уштен, пайремым эртараш йӧным йодыч. Тиде кечын Роза Николаевна Рябчикова шке тукымжо гыч 120 наре еҥым ик ӱстел йыр чумырен. А тидым ышташ куштылгыжак лийын огыл, молан манаш гын  пушеҥгысе ик вож гыч лекше укшлаш вераҥше да варажым тӱрлӧ могырыш шаланен пытыше лышташым ик верыш погаш пеш неле. Ик вӱр гыч лекше, тӱня мучко лакемше еҥ-влак шочмо вершыкышт пӧртылыныт.  Морко, Параньга, Марий Турек, Советский, Медведево районлаште, Москва олаште, Ставрополь кундемыште илыше-шамычат толыныт. Эшежым вес элыште илыше-шамычат улыт: Америкыште, Английыште, Финляндийыште. Кертшыже тиде тукым пайремыш толыныт, шкешт дене палдареныт да моло дене лишкырак палыме лийыныт. Южышт ты тукымын улмыжымат ты кечын веле пален налыныт.

Коновалов-Аксёновмыт тукымышто пашан ветеранже-влак шукын улыт. Николай Егорович Малинин «Знак Почета» орден дене палемдалтын. Роза Георгиевна Суркова «За трудовую доблесть» медальым шке жапыштыже сулен.

Тиде тукым гыч еҥ-влак шке илышыштым ялозанлык паша дене кылденыт гынат, моло профессийым ойырен налше да сеҥымашке шушыжат ятырын улыт. Коклаштышт филологий науко кандидат, доцент, Марий Элысе тӱвыран сулло пашаеҥже, Россий Федерацийысе кӱшыл образованийын почётный пашаеҥже Зоя Константиновна Ивановам ушештарыме шуэш. Елизавета Ивановна Коноваловамат чылан палат. Тудо — опер мурызо, Марий Элын сулло  да калык калык артисткыже, «Исповедь певицы» книган авторжо. Николай Анатольевич Коновалов — Татарстан Республикын сулло артистше. ВВС подполковник Константин Степанович Коноваловым,  Марий Элын сулло врачше Раисия Августовна Кубаревам, калык образованийын отличник-влак Римма Владимировна Романова ден  Татьяна Владимировна Пидалинам, лётчик Валентин Васильевич Романовым, Москосо кугыжаныш противопожарный службо академийын туныктышыжо Аксар Альбертович Эльтемеровым, подполковник Эдуард Аркадьевич Ягодаровым да молымат ушештараш лиеш.  

Чаманен каласыман, южышт толын кертын огытыл. Мутлан, 101 ияш Анна Дмитриевна Ведерникова, 96 ияш Екатерина Ивановна  Степанова. Нуно пашан ветеранже улыт.

Тиде тукымын эн изи шочшыжо-влакымат пырля конденыт ыле, тиде -февральыште шочшо Гордей Виноградовым, й ыгыр пелаш Аня ден Маша Капитоновмытым.

Пайремыш толшо-влакым Марий Турек районысо администраций вуйлатышын алмаштышыже, Марий национальный конгрессын районысо пӧлкажын чолга еҥже Лариса Ложкина саламлен. Кажне уналан Роза Николаевна аралтыш курчакым да тукым эмблемым кучыктен.

Пушеҥге веле огыл, айдемат шке тукымвожшо дене пеҥгыде. Ваш-ваш эҥертен, икте-весым шотлен, кылым пенгыдемден толмо дене илашат куштылго.  Сандене шке тукымын историйжымат, еҥже-шамычымат палыман. У родо- шочшо шке кугезе шамычше дене кугешнен кертше. А тыгай вашлиймаш икте-весым эшеат утларак лишемда.

Снежана Белова

 Снимкыште: Коновалов-Аксеновмыт тукым.

Фотом еш альбом гыч налме.

Опубликовать в Одноклассники

Добавить комментарий