РТРС-ын Марий Элысе филиалже кокымшо мультиплексын оборудованийжым пашаш колта: Волжск олаште, Пӧтъялыште да Сотнур селаште 21 ноябрь гыч тестовый трансляций тӱҥалын.
Кокымшо мультиплексын цифровой да аналоговый форматше-влакым иквереш ончыктымо дене телеканал-влакын финанс нагрузкышт палынак кугемын. Тидымак шотыш налын, кокымшо мультиплексын «цифран» трансляцийжым жаплан консервироватлыме. «Россий Федерацийыште 2009-2018 ийлаште телерадиовещанийым вияҥдымаш» федеральный целевой программе дене келшышын, аналоговый вещанийым иземдаш тӱҥалме марте кокымшо мультиплексын каналже-влакым 50 тӱжем деч шукырак еҥан олалаште гына ончыкташ кутырен келшыме. Тымарте Марий Эл Республикыште цифровой 20 каналым Йошкар-Олаште илыше-шамыч веле ончен кертыныт. Лишыл жапыште тыгай йӧн дене республикысе чыла еҥ пайдаланен сеҥа.
Телерадиовещанийым вияҥдымаш программын ик эн тӱҥ задачыже – уверым чыла еҥ деке намиен шукташ.
«Кокымшо мультиплексын передатчикше-влакым чӱктымӧ дене регионын да элын цифровизацийышкыже кӱлешан кугу ошкылым ыштыме. Эше икмыняр ий ончыч Волжскышто, Пӧтъялыште да Сотнурышто илыше-шамыч аналоговыйлан шотлалтше визыт деч шуко каналым ончен кертын огытыл. Кызыт палынак сай качестван 20 каналым ончаш йӧн ышталтын. У технологийым да единый информационный стандартым шыҥдарыме дене чыла еҥ нине каналым ик семын ончен кертеш. Тиде кызытсе тӱнян условийыштыже права кокла гыч ик эн кӱлешанже», – манеш РТРС-ын Марий Элысе филиалжын директоржо Андрей Шадрин.
Марий Элыште 31 цифровой станцийым чоҥымо да пашаш колтымо. Нунын цифровой сигналышт регионысо 99 процент калыклан кум ий толеш. Ынде цифровой телеканал-влакын чотышт кок пачаш кугемеш. Тидыже – кок пачаш шуко программе, еҥ, оҥай событий…
Республикыште илыше-влак шушаш У ийым 20 цифровой канал дене вашлийын кертыт. Тидыже каникулымат оҥайын эртараш амалым ышта.
Цифровой телевидений нерген радамлынрак СМОТРИЦИФРУ.РФ сайт але РТРС-ын 8 800 220 20 02 яра шокшо линийже полшымо дене пален налаш лиеш.
РТРС-1 пакет (икымше мультиплекс): «Первый канал», «Россия 1», «Матч ТВ», НТВ, «Пятый канал», «Россия К», «Карусель», ОТР да «ТВ Центр».
РТРС-2 пакет (кокымшо мультиплекс): «Рен ТВ», «Спас», СТС , «Домашний», «ТВ-3», «Пятница», «Звезда», «МИР», ТНТ да «МУЗ ТВ».
М.ИВАНОВА.
