Коронавирус инфекцийым шижтарыме мероприятий-влакым эртарыме дене келшышын, республикысе полиций пашаеҥ-влак рейдыш лектыт. Кодшо кечылаште нуно тидым Марий Элысе МВД-н общественный советшын еҥже-влак дене пырля ыштеныт.
Ты гана Йошкар-Олан рӱдӧ ужашысе уремлаштыже, кудывечылаштыже, кевытлаште лийыныт да коронавирус черлан шарлашыже эрыкым пуаш огыл манын, тӱшкан пайдаланыме верлаште маскым чийымын кӱлешлыкше нерген еҥ-влаклан эше ик гана ушештареныт. Кӧ тӱрлӧ амаллан кӧра маске деч посна лийын гын, нунылан … тудым кучыктеныт.
Общественный советын еҥже-влакын палемдымышт почеш, маске деч посна улмылан наказатлымаш огыл, а, мӧҥгешла, тыгай шкешотан пӧлекым ыштымаш калыкым маске режимым шукташ утларак кумылаҥда.
Л.КАМАЛЕТДИНОВА
