Шернур районышто «Сокол» футбол командым чумырымо годсек йӱлаш пурышо футбол тургымым майысе «пулько» дене почыт. Теният тыгак лийын.
Ӱмаште участник, тыгак ончышо-влакым игече шӱлыкаҥден гын, тений чевер кече куандарен. Шернур посёлкысо стадионышто май пайремлан пӧлеклалтше турнирыш, тений 14 команде чумырген.
Турнирыш Марий Турек, Параньга районла гычат сборный-влак ушненыт.
Марий Турек гыч БЭГиЗ команде икымше верыш лектын. Тудын кажне вашлиймашыже пенальти дене мучашлалтын. Мутлан, икымше матчыште «Акпатр» команде дене тӱҥ модмаш 1:1 счёт дене пытен гын, пенальти деч вара – 5:4 счёт. «Союз» команде денат тӱҥ матч 0:0 счёт дене иктешлалтын гын, штрафной деч вара 4:1 счёт лийын. Пелефиналыште адакат пенальти дене, ындыжым «Дубники» командым, 4:2 счёт дене сеҥен. Тӱҥ модмаш 1:1 ничья дене пытен. А теве финалыште «БЭГиЗ» Чылдемыр гыч «Эрон» сборныйым 4:3 счёт дене се‰ен. Ты команде денат тӱҥ матчыште 1:1 счёт лийын.
Теве тыге эн кугу футбол пєлек, кубок, Марий Турекыш «кудалын».
– Шукерте огыл Новочебоксарскыште Шернур гыч «Сокол» футбол команде «Бокс» сборный дене йолташла вашлиймашым эртарен, 2:1 счёт дене ончыко лектын, – ойла Шернур футболист-влакын вуйлатышышт А.Иванов. – 10 майыште футбол дене Марий Элын кубокшо верч таҥасымаште «Сокол» (1/8 финалыште) Йошкар-Ола гыч «Авиатор» сборныйым 4:0 счёт дене сеҥен. Соперникын капкашкыже Артём Михеев, Борис Щеглов, Родион Глушков, Павел Паймаков мечым пуртеныт. Тургымын турнирыштыже тиде мемнан икымше матч, икымше сеҥымаш.
Таҥасымаш умбакыже шуйна.
Е.Эшкинина.
