УВЕР ЙОГЫН

… Пуйто тарантас дене кудалме!

«Лӱдыкшыдымӧ да сай качестван автомобиль корно» национальный проект дене келшышын, республикыштына ятыр вере корным чоҥат але тӧрлатат гынат, ты пашам шукташ эше кажне кундемышкыжак миен шуын огытыл. Тиде амал дене южо вереже корно тугае – сар жапыште бомбитлен эртыме деч варасе гай, товатат. Да тидыжым шкеат сайын паледа…

Теве Йошкар-Ола-Шернур кугорно гыч У Торъял велыш савырнымеке, тудо лач тыгай! Кокланже тарантас дене кудалме гай веле чучеш! Тунар чытырыкта да «тӧршталтен-тӧршталтен» кудалат. Кӧлан тыште эрташыже логалын гын, очыни, иктат ты корным семынже вурсыде кодын огыл.

Теве меат кодшо арнян У Торъял районыш командировкыш мийышна да пытартыш жапыште тысе корнын тынар чот локтылалтмыжлан ӧрна. Икмыняр ий ончыч тудым «тумыштылыныт» ыле. Южо вереже уэш асфальтымат шареныт. Но жап шукат эртен огыл – угыч лаке ӱмбалне лаке. Кажныжымак «шотлен каяш» огыл манын, водитель рульжым пӱтыркален гына шуктыжо!

Тидын нерген коклаштына мутланен, огына шылте, вурсенат кудалмына годым ужына: ончылнына, Тошто Торъялыш савырныме тураште, дорожник-шамычын техникышт да пашаеҥ-влак койыт! Иктышт лакым эрыктат, весышт асфальтым шарат, кумшышт тӧремден эртат ыле. Тыгай куанле сӱретым ужмеке, чарналтенак шогална да нунын дене мутым вашталтышна.

«Дорстройын» У Торъялысе филиалжын мастерже Алексей Речкинын ойлымыж почеш, У Торъял поселко гыч Нурсола савыртыш марте ужаш корным, 22 километрым (но шукерте огыл верҥдыме корно указательыште райрӱдӧ марте ала-молан 21 километр манын возымо… — авт.) ачалаш 15 майыште тӱҥалыныт. Тыгодым кунам пытарышаш шотышто срок палемдалтын огыл. Тыге гын, пашаштым вашкыде, сайын шукташ жапышт уло, лектеш.

— Тыште фрезероватлыше кум тракторист, битумым пыштымаште кум еҥ, асфальтым шарымаште вич еҥ тыршат.

Пашам мучашлыме жап мемнан дене веле огыл, эше игече денат кылдалтеш. Мотор игече шогаш тӱҥалеш гын, писынрак ыштен шуктен кертына, — каласыш мастер А.Речкин.

 Тугеже тек пашашт писынрак ушна, вет мыняр вашкерак нуно шуктат, тунар вашкерак еҥ-влак мотор сай корно дене лыж-ж гына кудал колтат. А тидым моткочак шукын вучат!

Любовь КАМАЛЕТДИНОВА

Опубликовать в Одноклассники

Добавить комментарий