Проект пашаш ушныманак
Кушкыжмын Марий Элын Тӱвыра, савыктыш да калык паша шотышто министерствыже пеленысе Калык-влакын пашашт шотышто советын черетан заседанийже эртен.
Министр К.Иванов советын еҥже-влаклан – республикыштына улшо тӱрлӧ калык-влакын мер организацийыштым вуйлатыше-шамычлан – Марий Элыштына кугыжаныш национальный политике кышкарыште шукталтше паша дене палдарен. Тений 11 коммерческий огыл мер организаций 13 проектым илышыш шыҥдара. Вес ийлан ты кугыжаныш программыш ушнаш 1 ноябрь марте йодмашым налыт. Константин Анатольевич национально-культурный мер организаций-влаклан РФ калык-влакын шочмо йылмыштым аралыме да вияҥдыме фондын, Граждан обществым вияҥдыме шотышто президент грант фондын, ФАДН-ын коммерческий огыл организаций-шамычлан духовно-просветительский пашалан полышым пуымо проект конкурслашкышт ушнаш темлен. Тидланже, мутат уке, организацийлан регистрацийым эртыман.
Советын еҥже-влаклан министр кызыт чоҥалтше Келшымаш пӧртын проектше дене палдарен. Тудым жап деч ончыч, 2022 ий мучаш марте, сдалтен шукташ лийыныт. Тылеч посна Сеҥымашын ХХХ-шо идалыкше лӱмеш тӱвыра полатым уэмден тӧрлаш да тушто Национальный тӱвыра пӧртым ышташ палемдыме нерген увертарен.
Заседанийын участникше-влаклан Марий Элысе МВД-ын миграций йодыш дене управлений начальник полиций полковник А.Дмитриев 2021 ийыште миграционный законодательствыште лийше вашталтыш-влак дене палдарымыжат пайдале ыле. Алексей Евгеньевич йот элла гыч илаш толшо-влаклан диаспор ден мер организацийла дене кылым кучаш темлымашыжымат кумылын вашлийыч.
С.Пехметова
