7 сентябрьыште Киров олаште марий просветитель да миссионер П.Глезденевлан мемориал оҥам почыныт. Павел Петрович — марий периодический печатьлан («Война увэр» газет) негызым пыштыше, «Тӱҥалтыш марла книгам», «Вес марла книгам» (шымлызе В.Васильев дене пырля), «Марий арифметикым» савыктыше, марий-влак коклаште шочмо йылме дене просветитель пашам вӱдышӧ, калыкнан шинчымашыжым нӧлтышаш верч тыршыше мер да кугыжаныш пашаеҥ.
Марий юмыйӱлам кучышо кресаньык ешыште шочын-кушшо пошкырт марий 25 ияш тынеш пурен, епархийысе миссионер марте кушкын. 1918 ийыште священник сан деч кораҥын. Тудо 100 ий ончыч Марий калыкын икымше погынжым ямдылыше да эртарыше-влак коклаште лийын, Виче кундемыште «Марий ушем» толкыным тарватен. Виче губерний земствын инородческий образований пӧлкажым вуйлатен.
Павел Петровичын кугу просвещений паша лектышыж дене тачат пайдаланена – марий газетым, журналым ямдылена, лудына… Мемориал оҥам Кировышто почаш кӱлмӧ нерген мут «Марий Эл» газетын 100 ияш лӱмгечыжлан пӧлеклаште марий форумышто йоҥгалтын. Молан лач тушто почман? 56 ияш илыш дене чеверласыше П.Глезденев пытартыш ийлажым (1907-1923 ийлаште) Вяткыште (Виче) илен, Вятка калык образований институтын ученый секретарьже лийын, Вяткысе научно шымлыше институтын краеведений отделжым вуйлатен. Павел Петровичым тиде олаштак, Ахтыр шӱгарлаште тойымо.
Кумданрак — «Марий Эл» газетын
16 сентябрьыште лекше номерыштыже лудын кертыда.
С.Пехметова.
Авторын фотожо.
