ТАЗАЛЫК

«Полшынем ыле да…» манме деч

Вашкеполыш

«Полшынем ыле да…» манме деч

10 июньышто Йошкар-Олаште Йыван Кырла уремысе 17-ше №-ан пӧрт кундемыште азап лийын: 45-50 ияшрак пӧръеҥ эпилепсий приступ дене йӧрлын. Можым-кузежым умылымек, воктечше эртен ошкылшо еҥ-влак черлылан нимо денат полшен кертын огытыл. Ӱжыктымӧ «вашкеполышат» вигак толын огыл. Кужу жап полыш деч посна кийымылан кӧра пӧръеҥын ӱмыржӧ кӱрылтын. «Вашкеполыш» бригадын шучко диагнозшым колмек, шукынжо полшынем ыле да тыгай годым мом ышташ ом пале манын шоналтеныт, икмынярынже йӱкынат каласеныт.  

Эпилепсий приступ годым черлылан жапыштыже полшаш кӱлешан. Йӧрлшӧ айдемын шӧнжӧ шупшеш, умшаж гыч шоҥ лектеш, вӱргорно давленийже кӱза, чурийже ошемеш, приступшо 3 минут деч шуко шуйна, приступ деч вара 10 минутышто нормыш ок тол, мӱшкыран, икшыве але илалше, сусырген гын, жапым шуйкалыман огыл – эн ончычак «вашкеполышым» ӱжыктыман да черлылан полшаш пижман.

  1. Черлым вияш да пушкыдырак верыш шӧрын пыштыман.
  2. Пиктыше вургемже ден арвержым кудашман, луштарыман але кораҥдыман.
  3. Лиеш гын, вуйжым шӧрын ыштыман.
  4. Шкенжым сусыртен кертше чыла арвержым поген налман.
  5. Южо еҥ эпилептикым лийме семын пеҥгыдынрак кучаш темла, но тыгеже тудын лужым пудыртен кертме лӱдыкшӧ кугу. Черлым мланде але кӱвар пелен изишак темдал кучымат сита.
  6. Умшажым чот петырен гын, виеш почаш тыршыман огыл, молан манаш гын шӧн шупшмо годым тидым ышташ моткоч неле, эсогыл айдемын пӱйжым пудырташ але парня деч посна кодаш лиеш.
  7. Умшашкыже пеҥгыде арверым чыкыман огыл, тудо умшагӧргым сусыртен але пӱйым пудыртен кертеш. Черлылан вӱдымат пуаш ок кӱл. Мален колтен гын, тек мала.
Опубликовать в Одноклассники

Добавить комментарий