Общероссийский калык фронтын Марий Элысе пӧлкаже лумым эрыктыме качестве шотышто «шокшо линийым» почын. Корнысо лумым начарын эрыктыме да калык шуко улман верлаште ий налме шотышто 8 (8362) 45-51-70 номеран телефон дене йыҥгыртен але 12region@onf.ru электрон адресыш возен вуйым шияш лиеш.
«Калык фронт кажне телым муниципал, корно службо, виктарыше компаний-влакын ола уремлам эрыктымыштым терга. Эмлымверыш, йочасадыш, школыш, тӱвыра тӧнежыш да моло социальный организацийыш наҥгайыше корно-влакым эрыктымылан поснак кугу тӱткышым ойыра. «Шокшо линийыш» республикысе чыла район гыч йыҥгырташ лиеш», – рашемда регионысо ОНФ-ын сопредседателье Руслан Гизатуллин.
М.ИВАНОВА.
