ГАЛЕРЕЙ

Пеледше май – Сеҥымаш да Кугече пайрем

Кугу Сеҥымаш да Кугече пайрем-влак Йошкар-Олаштына кумдан палемдалтыныт. Мыят 7-8-9 майыште волонтёр да Кугу Отечественный сарын ветеранже-влак дене пырля Курымашлык тул воктеке пеледыш аршашым пышташ миенна.

Ветеран-влак кокла гыч шукынжо черле улыт, санденак ты пайрем кечын тышке толын огыт керт. Тидым шотыш налын, ме 1924 ий 11 майыште шочшо Александра Матвеевна Прокофьевам мӧҥгыштыжак саламленна. Тыгак Борис Георгиевич Гончаров деке миенна. Тудыжо тоя дене  веле коштеш, а шочынжо 1926 ий 21 июльышто. Мемнан толмылан пеш йывыртен.

– Авам 87 ийым илен, мыят ынде кугу ийготан улам.  Илем шкетын. Тыге лектын… – ойла сарын ветеранже. – Сеҥымаш кечым ме йолташ-влак дене  Чехословакийысе Прага олаште вашлийынна. Сеҥымаш кечым 9 майыште палемдыме, а ме бой гыч 13 майыште веле лектынна. Тораш лӱйкалыше артиллерийыште служитленам. Прагыште кугу кредалмаш лийын. Немыч-влак шке армий дене американ-влак деке моткочак лекташ шоненыт, но ме авырен налме фашист-влакын войскаштым, (орудий мемнан пеш куатле лийын – 122-152 мм гаубице, 25 км тораш лӱя) шалатен пытаренна. Снаряд танкыш логалеш – нимат огеш код… Ала-момат ужынам, шуко чыташ логалын. Сар деч вара Совет Армийыште латкум ийым служитленам: Венгрийыште, вара – Касвел Украинысе Львов олаште. Тушто бандеровец-влакым «почкенна». Нунышт чодыраште шылын коштыныт, шеҥгечын тупышкына лӱйкаленыт. Кызыт нуно адакат ылыж каеныт, пуйто чыланат сарым монденыт. Вара Марий Турек гыч пелашемым вашлийынам, ӱдыр ден эргым ончен куштенна. Мый ӱмыр мучко чоҥышын пашажым ыштенам. Шкеже Ростов областьыште шочын кушкынам. 

9 майыштак Курымашлык тул пелен «Гром» десантник-влакын отрядышт дене пырля Александр Степанович Дербеневым войзен налынам. Тудыжо лачак родо-тукымжо дене пырля уремыш лектын ыле. Александр Степанович 1926 ийыште шочын, Кугу Отечественный сарыште – артиллерист. Фашист деч Молдавийым, Австрийым, Румынийым утарымаште лийын да Сеҥымаш кечым Югославийыште вашлийын.

Курымашлык тул воктенак верысе гарнизон гыч салтак-влак лийыныт, С. Радонежский лӱмеш гимназийын тунемшыже-влак мурым муреныт да сӱретлыме ош кӧгӧрченыштым нунылан пӧлекленыт – ракетчик-влак элнам йӱд-кече аралат. Тыгай пӧлеклан салтак-шамыч куаненыт.

Чарла Кремльыште эртаралтше Кугече ярмиҥгаш калыкым саламлаш Йошкар-Ола депутат-влак погынымашын председательже Виктор Кузнецов, рӱдола черкысе округын благочинныйже, протоиерей Андрей Норкин, Марий Эл тӱвыра, савыктыш  да калык паша министр Константин Иванов да молат миеныт. Пайрем годым Константин Иванов протоиерей Андрейым Марий Эллан 100 ий  теммылан пӧлеклалтше «Калык верч тыршымаш» медаль дене палемден. Нуно калык дене пырля каваш ош кӧгӧрченым колтеныт. Ярмиҥгаште калыклан кидпаша-шамыч темлалтыныт, мурымаш-куштымаш лийын. Ты кечын Чарла Кремльыш толшо-влакым шемшыдаҥ пучымыш да чай дене сийленыт.

М.СКОБЕЛЕВ

Авторын фотожо

Снимкыште: 1718 — Самырык тукым Александр Степанович Дербеневым Сеҥымаш кече дене саламла 1913 — Чарла кремльыште – Кугече ярмиҥга  2084 — Г.Тимиряев  казак сабле  дене фланировкым ончыкта  2136 «Звезда»  студийын «Катюша» мурыж почеш пият кушта 1318  Ветеран-влак 1738  «Курымашлык тул» воктене  кугезе коча-влак дене пырля 1822, 1816 – Мемнам аралыза 1285 — Волонтёр-влак Сеҥымаш кече дене Б.Гончаровым саламлат

 

Опубликовать в Одноклассники

Добавить комментарий