ВКонтакте социальный кылысе «Коронавирус. Марий Элын оперативный штабше» официальный каналын палдарымыж гыч, 23 апрельыште регионыштына у коронавирус инфекций дене авалталтме эше 15 у случайым регистрироватлыме. Тыге, республикыштына COVID-2019 дене чылаже 348 еҥын черланымыжым пеҥгыдемдыме.
Марий Элын Тазалыкым аралыме министерствыжын увертарымыж почеш, эртыше суткаште республикнан стационарлаж гыч у коронавирус инфекций шотышто эмлалтме курсым эртыше кум пациентым мӧҥгышкышт колтымо. А пандемий жапыште чылаже 84 еҥ, ты шотыштак коронавирусан 46 пациент, паремын да ончычсо илыш радамышкыже пӧртылын. Тыгодымак коронавирус дене черланымым пеҥгыдемдыме диагнозан да инфекцийым авалтен кертыныт манын шонымо моло пациентым умбакыже эмлат:
• Йошкар-Оласе больницын инфекционный да пужен профилироватлыме терапевтический отделенийлаштыже – 153 еҥым, ты шотыштак коронавирусан 20 пациентым;
• Йоча республиканский клинический больницыште – 15 икшывым, ты шотыштак коронавирусан 5 черлым;
• Звенигово районысо рӱдӧ больницын коронавирусан пациент-влаклан палемдалтше отделенийыштыже – 10 еҥым, черле-влак чыланат коронавирусан улыт;
• Козьмодемьянск межрайонный больницын инфекционный отделенийыштыже – 12 черлым, ты шотыштак коронавирусан 7 черлым;
• Волжск оласе рӱдӧ больницын инфекционный отделенийыштыже – 11 пациентым, ты чот гыч 2 еҥын коронавирус дене черланымыжым пеҥгыдемдыме;
• Марий Турек районысо рӱдӧ больницын инфекционный отделенийыштыже – 26 еҥым, ты шотыштак коронавирусан 8 пациентым;
• Медведево районысо рӱдӧ больницын коронавирусан пациент-шамычлан хирургический да акушерско-гинекологический профилян медицине полышым пуымо корпусыштыжо – 10 пациентым, ты чот гыч 6 черлылан «коронавирус инфекций» диагнозым шындыме.
Икманаш, республикнан инфекционный стационарлаштыже чылаже 237 еҥ эмлалтеш, тӱҥ шотышто – пневмоний деч. Палемдыме чот гыч 58 пациентын у коронавирус инфекций дене черланымыжым пеҥгыдемдыме. 38 черле неле состоянийыште, 188 еҥын тазалыкше «нелылыкын кокла йыжыҥже» семын аклалтеш, латиктын – «нелылыкын куштылго йыжыҥже» семын.
Кок пациент шодым искусственно вентилироватлыме йӧн дене шӱла, 59 еҥлан кислород кӱлеш.
М.ИВАНОВА
