Шошо тӱҥалме кечын республикым вуйлатыше правительстве пӧртыштӧ журналист-влак дене вашлийын. Чайым подылын, мутланен шинчымаш кучем ден прессе коклаште пеш кӱлешан йодышлам поро кумылын каҥашымашке савырнен. Чылажат шӱкшак нерген мутланымаш гыч тӱҥалын. «СМИ-лаште «шӱкшак нерген» законым йоҥылыш умылтарат», лач тыге каласен кундемым вуйлатыше журналист-влак дене мутланымыж годым. Александр Евстифеевын шонымыж почеш, журналист-влак шкеныштын возымаштышт кугу тарифлан тӱҥ тӱткышым ойырат, тидын годымак президентский законын тӱҥ шонымашыжым – экологийым аралыме йодышым – ӧрдыжеш кодат. Лачшымак шӱкшакым шот дене погымо да перерабатыватлыме паша пӱртӱсым амыргыме деч аралаш полшышаш. Элыште пеҥгыде бытовой шӱкшакым погымо да перерабатыватлыме системе ышталтеш, тиде пашам шуктымым терген шогымаште вашталтыш лиеш.
Ик шагат шуйнышо мутланымаште Александр Евстифеев экономический, политический йодыш-влакым тарватен, уна-влакланат шке шонымашым луктын каласаш йӧным пуэн.
«Марий Эл» ГТРК вуйлатыше Станислав Маринин ден «Марий Эл Телерадион» вуйлатышыже Светлана Талова ончыкылык планышт дене палдареныт. «Марийская правда» газетын генеральный директоржо-тӱҥ редакторжо Сергей Дружинин «Российская газета» ик эн кугу издательстве дене пайдалын пырля тыршыме шумлык договорым ыштыме нерген кугешнен, ойлен.
«Марий Эл» газетын тўҥ редакторжо Александр Абдуловын ойлымыжо республикым вуйлатышым юрист семын «ӧрыктарен». Марий Эл Республик Кугыжаныш Погынын лукмо республиканский закон-влакым шке изданийыштышт савыктышашлан марий йылмыш газетын редаткоржо-влаклан шкаланышт кусараш логалеш улмаш. Александр Евстифеев тыгай экшык шотышто чылажымат рашемдаш культур, печать да национальность паша шотышто министр Константин Ивановлан кӱштен. «Кугыжаныш Погын документ-влакым пуышаш, а газет нуным савыктышаш гына. Журналист-влакын возымо закон виян лийын огеш керт», – каласен республикым вуйлатыше.
Шкеныштын проблемышт да шумо сеҥымашышт дене рӱдӧ оласе коллегыштым районласе журналист-влакат палдареныт. Тиде рольым шке ӱмбакыже «Морко мланде» газетын тӱҥ редакторжо Анатолий Титов налын. Анатолий Анатольевичын ойлымыжлан вашештымыж годым республикым вуйлатыше ялысе журналист-влаклан шкаланышт келшыше аудиторийым муаш темлен. Шагал еҥлан газетым савыктен лукмаш пайдале огыл, роскотыш гына пурта.
Пытартышлан ойыртемалтше журналист-влаклан наградым кучыктымо. Грамотым «Марийская правда», «Пенсионер ваш друг и советчик», «Марий Эл» газет редакцийлаште ыштыше журналист-влак налыныт.
П.Шакиров ямдылен.
