Газетыштыда иктешлыше кугыжаныш экзаменым ончылгоч кучымо нерген возенда ыле. Палыме шуэш: мемнан республикыште тений ЕГЭ-м ончылгоч мыняр еҥ кучаш тӱҥалеш?
О.СЕРГИЕНКО.
Йошкар-Ола.
Йодышлан Марий Элын Образований да науко министерствыжын специалист-экспертше Галина Панкова вашешта:
— Тений ЕГЭ-м ончылгоч 23 март гыч 7 апрель марте кучат. 10-14 апрельыште шапаш кече-влак лийын. Рособрнадзорын палемдымыж почеш, элна мучко 44 тӱжем еҥ иктешлыше кугыжаныш экзаменым ончылгоч куча. Тидлан 200 пунктым ямдылат. Марий Элыште мартыште экзаменым кучаш 144 еҥ йодмашым пуэн, ӱмаште 54 еҥ гына возен. Тӱҥ шотышто экзаменым ончылгоч школым икмыняр ий ончыч тунем пытарыше-влак кучат. Тидлан Йошкар-Олаште ЕГЭ-м возымо кок пункт пашам ышташ тӱҥалеш. Тидын годым КИМ-ым аудиторийыштак у технологий полшымо дене печатлен луктыт да туштак сканироватлат.
Л.ШАБДАРОВА.
