СПОРТ

ОЛИМПИАДЫШ КАНДИДАТ, ТӰНЯМБАЛ ЧЕМПИОН…

Идалыкым иктешлыме семын эртыше ийын эн сай спортсменже-влакым ушештарен кодена. Марий Элыште спорт илыш вияҥынак вияҥеш, ӱдыр-рвезе-влак тӱрлӧ видыште сай результатым ончыктат, республикым, Российым тӱнямбалне чапландарат. Нунын дене кугешнаш лиеш. 50 наре спортсмен тӱрлӧ вид дене – Российын сборный командыштыже. Физкультур да спорт дене пеҥгыде кылым кучымаште 85 регион коклаште кокымшо верыште улына.

 Эртыше идалыкыште сай кӱкшытыш шушо семын Шернур кундемын тале ӱдыржӧ Людмила Лебедевам ончыктыман.Людмила икмыняр ий почела «Идалыкын эн сай спортсменже»! семын палемдалтын. Теният тиде рейтинг гыч кораҥын огыл. Элыштына эртаралтше таҥасымашлаште ик гана веле огыл икымше верыш лектын, Российын чемпионжо лийын, тӱнямбал чемпионатын кок гана участникше Олимпиадыш кандидат семынат палемдалтын. Таче кечынат Российын сборный командыште ик эн тале куштылго атлет семын аклалтеш. Кӱчык кутышыш куржталше Айвика Малановат элнан сборныйжын чапшым арала.  

Сокыр-влак коклаште мини-футбол дене паралипийский Олимпиадыш логалше кум футболистым: Евгений Ивановым, Василий Николаевым, Кирилл Печениным – палемдыман. Марий Элын спорт историйыштыже тыгайже икымше гана лийын.

Тыгак мемнан кундемлан келшыше видыште, ечыгорнышто, ечызе-влак ойыртемалтыт. Кужэҥер районысо Коҥганур кундем гыч Алевтина Таныгина Российын сборный командыж дене тӱнямбал кӱкшытан таҥасымаште вийжым терга. Тыгак биатлон дене Звенигово гыч Надежда Белкина Украинын командыж дене пырля тӱнямбал кубокышто таҥаса. Медведево район гыч Екатерина Смирнова  результатшым саемда. Шукерте огыл Сыктывкарыште 17 ияш Ярослав Егошин ече дене всероссийский таҥасымаште классик йӧн дене (7,5 км) нылымше верыш лектын, коньки йӧн дене (10 км) ший медальын озаже лийын. Тыге тудлан  XIII Европейский юношеский Олимпийский теле фестивальыш (11-18 февральыште Турцийыште эрта) каяш корно почылтын. Тидыже лишыл жапыште рашемдалтшаш. Республикыште икмыняр ий почела чемпион лӱмым налше Дмитрий Чекулаев всероссийский таҥасымаште теле тургымым почмаште абсолютный чемпион лийын. Ветеран-влак коклаште таҥасыше Тамара Григорьева йот эл гыч икмыняр ий почела сеҥымаш да икмыняр медаль дене пӧртылеш.

Республикыште синхрон куштымаш да фигурный мунчалтымаш дене Россий кӱкшытан первенствым эртарыме йӱлаш пурен. Лӱмлӧ спортсмен-влак марий ий ӱмбалне таҥасат.  

Спортын моло видыштыжат спортсмен-влак тӱнямбал кӱкшытыштӧ вийыштым тергат, призёр радамыш логалыт. Шернур кундем гыч эше ик чолга ӱдырым, Полина Петуховам, ятырынже палат. Тений Полина кикбоксинг дене тӱнямбал первенствыште призёрыш лектын. Тайский бокс дене Российын первенствыштыже сеҥыше, тӱнямбал кӱкшытыштак бриллиант кубокын озаже, кикбосинг денак тӱнямбал чемпион лийын. Кекусинкай каратэ дене землякна тӱнямбал кӱкшытыштӧ ойыртемалтеш. Всестилевый каратэ дене Сергей Заньков (Российын кум гана чемпионжо) спорт мастер нормативым шуктен.

Грек-рим кучедалмаш дене Волжск гыч Алексей Власов ончыкылан сай ӱшаным пуа. Тений шке нелытанже-шамыч коклаште (38 кг) Российын первенствыштыже икымше верым налын.  Российын сборный командыж дене пырля самырык рвезе (16 ияш марте) учебно-тренировочный сборышто лийын.

Гребля дене Волжск гыч Илья Данилов Европын первенствышкыже ойырымо турышто нылымше вер дене палемдалтын.

Шахмат дене эртыше тӱнямбал первенствыште 11 ияш Екатерина Насырова Российын чапшым арален, шке тӱшкаштыже кокымшо верым налын, вице-чемпион лийын. Корэшыште Муса Галлямов кок ий почела Российын чемпионжо лӱмым куча. Тылеч посна моло видыште да моло тале спортсмен-влак нерген газетыштына ик гана веле огыл возенна.

Команде дене выступатлыше-шамычымат палемден кодыде ок лий. Фитнес-аэробике дене «Экстрим» команде Европын чемпионатше гыч шӧртньӧ медаль дене пӧртылын. Россий кӱкшытыштӧ модшо «Мариэлочка»  ӱдырамаш команде (икымше лига) «Волга» зонышто ончыко лектын. «Спартак Марий Эл» футбол команде, «Ариада-НХ» хоккей сборныят тыршат.

Е.Эшкинина.

Опубликовать в Одноклассники

Добавить комментарий