Шернур районысо Зашижемье села райрӱдӧ деч 18 меҥге тораште верланен. 1925 ий марте тудо Вечын губернийын Уржум уездысе Косолоп волостьыш, 1935-1959 ийлаште Косолоп районыш пурен, а Шернур районынлан 1959 ий гыч шотлалтеш.
«Зашижемье» лӱм Шижма эҥер вес велне улмыжым ончыкта.
Тиде села XIX курымын 30-шо ийлаштыже Кӱшыл Зашижемье ял гыч Е.Ельсуковын илаш куснымыж дене шочын.
Зашижемье ял шотан илем администрацийым Елена Михайловна Дождикова вуйлата. Мийымына годым тудо больничныйыште лийын, сандене верысе кундемыште илыш кузерак воранен кайыме нерген специалист-влак Татьяна Севрюгина, Надежда Романова да Любовь Глушкова (снимкыште) дене мутланышна.
– Татьяна Михайловна, ял шотан илем администрацийыш мыняр да могай ял-влак пурат?
– Кундемна изижак огыл, 11 ял пура: Зашижемье, Кугу Шопкер, Изи Шопкер, Шӱдымарий, Ошет, Таракан, Калий, Кугушен, Моркэҥер, Кожласола, Часамлаял. Нине илемлаште чылаже 1200 утла еҥ ила. Ошет, Шӱдымарий яллаште илыше укеат, Моркэҥерыштат икмыняр еш веле.
– Ял калык кушто пашам ышта? Самырык-влак, ялысе школ деч вара иктаж вузышто але сузышто специальностьым налмеке, мӧҥгеш пӧртылыт мо?
– Ял калык школышто, ФАП-ыште, йочасадыште, тӱвыра пӧртыштӧ, кевытлаште пашам ыштат, тыгак «Сернур-Агро» ялозанлык предприятий икмыняр паша верым пуэн. Моло кундемысе семын шукынжо Москош, Озаҥыш, Нижний Новгородыш кугу пашадарым кычалын каят. А самырык-влак, специальностьым налмеке, шагалынже мӧҥгеш толыт, олашкак илаш, пашам ышташ кодыт. Ончыч, «Россия» совхозна годым, верысе калыклан паша вер шукак лийын. Тудын пытымекыже, яллаште илыше шагалемеш.
– Туге гынат кундемыште пӧртым нӧлтышӧ-влакат улыт?
– Самырык еш-влак шке вий дене нӧлтат, но тыгайышт шагалын улыт. Сӱан дене ешым чумырышо укеат манаш лиеш, пытартыш гана 2019 ийыште марий сӱан гӱжлен. Самырык да шуко шочшан еш-влак кугыжаныш могырым полышым налмеке, ялыш кодаш огыт тырше. Кундемыштына шуко шочшан 19 еш уло, нуно кум-ныл икшывым куштат…
!!! Умбакыже «Марий Эл» газетыште лудаш темлена!!!
А.БАЙКОВА
Авторын фотожо
