ЯЛОЗАНЛЫК

Мемнан сатунам йот эллаштат палат

Марий Эл 2025 ийлан йот эллашке 25 миллион доллараш ялозанлык сатум ужалыме кӱкшытыш шушаш.

Москваште эртыше «Шӧртньӧ шыже» 21-ше агропромышленный выставке гыч Марий Элын 30 медальым кондымыж нерген газетна увертарен ыле. Ий гыч ийыш медаль-влак ешаралтыт, предприятийна-влак чапле качестван да экологий могырым яндар у тӱрлӧ кочкыш сатум ямдылат да тудым шкенан кундемыште да лишыл регионлаште веле огыл ужалат, йот эллашкат колтат.     

«Тӱнямбал коопераций ден экспорт» национальный проект негызеш республикыштына «АПК-н продукцийжым йот эллашке колтымаш» региональный проектым ямдылыме. Тиде проектын тӱҥалтыш кандаш тылзыштыже йот эллашке Марий Эл гыч кочкыш сатум да ялозанлык сырьём чылаже 5,5 миллион долларашым колтымо. Талук мучаш марте тиде чот 14,5 миллион доллар марте кугемшаш. Тышкыже, ялозанлык да продовольствий министрын алмаштышыже Л.Смирнован мутшо почеш, эн ончычак сурткайык шылым да субпродуктым шукырак колтымо, тыгак нылымше кварталыште пырчым да шукияш шудо нєшмым ужалыме кўшеш шуаш палемдыме.

Тений «Акашевский» сурткайык фабрике кок тӱшка сатужым Китайыш колтен, кызыт чыве шылым Сенегалыш ужалыме шотышто мутланат. Эшеже тиде предприятияк чыве терысым органический ӱяҥдышыш савыра да лишыл жапыште икмыняр элыш колташ тӱналеш.

Раш, йот эллаште ялозанлык чот вияҥше. Сатуна лачак чапле качестван да экологический яндар улмыжлан кєра гына ме вес эл-влак дене таҥасен кертына. Тений мемнан предприятийна-влак шке сатуштым тӱнямбал кӱкшытан выставкылаште ончыктеныт. «Продэкспо-2019» да «Арабия-ЭКСПО 2019», «РОСГЛАВПИВО» тӱнямбал выставкылаште, торговльым вияҥдыме шотышто «Ик ӱштӧ, ик корно» форумышто (Китайысе Сиань ола) лийыныт. Москваште эртыше 21-ше Всероссийский агропромышленный выставке деч вара пале лийын: тений декабрьыште Францийысе Сенте олаште эртышаш Рошто ярмиҥгаште шке сатуштым Марий Элысе предприятий-влакат ончыкташ тӱҥалыт.

Марий Элын ялозанлык да продовольствий министрже А.Гречихон мутшо почеш, Российын Ялозанлык министерствыже республик ончылан тыгай задачым шынден: 2025 ийлан ялозанлык продукцийым экспортыш колтымо кӱкшытым 25 миллион долларыш шукташ. Тышке шуаш куштылго огыл гынат, тидлан негыз уло. Мутлан, 2018 ийыште ялозанлык сатум ыштен налме индекс шотышто Юл кундем федерал округышто ме икымше, Россий Федерацийыште визымше верыш лектынна. Тидыже мемнан кочкыш сатуна кугу йодмаш дене пайдаланымым пеҥгыдемда.

В.СМОЛЕНЦЕВ.

Авторын фотожо.

Опубликовать в Одноклассники

Добавить комментарий