УВЕР ЙОГЫН

Медик-влак мӧҥгышкышт пӧртылыныт

Таче Волжск оласе рӱдӧ больницын первичный вӱргорно отделенийжын вич пашаеҥжым у коронавирус инфекций шотышто карантин гыч луктыныт.
Реанимаций да интенсивный терапий палатын медсестраже Анна Сергееван, неотложный кардиологий палатын медсестраже Татьяна Крылован, участковый врач-терапевт Ирина Верёвочкинан, неотложный кардиологий палатын медсестраже Людмила Петрован (снимкыште шола гыч пурлашке шогат) да служебный помещенийын уборщицыже Надежда Ускован (покшелне ) куаныштлан мучаш уке, вет нуно пелашышт, шочшышт, лишыл еҥышт дене тичмаш кок арня ужын огытыл!
Отделенийын карантиныште лийше пашаеҥже-влакым ОНФ-ын Волжский районысо волонтёржо Денис Смирнов ден тудын йолташыже Денис Земляницкий вашлийыныт. Кумылыштым нӧлталаш, лӱдыкшӧ да неле жапыште шкем чаманыде тыршымыштлан таушташ шонен, рвезе-влак кажныжлан пеледыш аршашым да мӧҥгышкышт костенеч шотеш наҥгаяш тортым кучыктеныт.
Тыгай тӱткыш медпашаеҥ-влакынат кумылыштым налын, но кужун мутланен шогылташ чонышт чытен огыл – машинашкышт шинчын, мӧҥгышкышт писынрак чымалтыныт.
Медик-влак дене пырля эше 11 пациентым мӧҥгышкышт колтеныт, кокытшым эше эмлалташ коденыт.
Ушештарена, кок арня утларак ончыч тиде первичный вӱргорно отделенийыш Провой кундем гыч ик пациентым эмлаш пыштеныт, но кардиологий профиль дене медицине полышым пуымо годым врач-влак тудын коронавирус дене авалталтмыжым рашемденыт. Черлым Звенигово районысо рӱдӧ больницын коронавирус инфекциян пациент-шамычым эмлыме отделенийышкыже кусареныт, а Волжск оласе рӱдӧ больницын первичный вӱргорно отделенийжым тичмашнек кок арнялан карантиныш петыреныт. Тыге ик врач, кум медсестра, ик санитарке да 13 пациент отделений гыч лектын кертдыме лийыныт.

М.ИВАНОВА
Д.Смирновын фотожо

Опубликовать в Одноклассники

Добавить комментарий