РУБРИКИ

Мастарлык: Тыште «йолчиемымат» кочкаш темлат

Шоколадым кӧ огеш йӧрате? Ме, ӱдыр, ӱдырамаш-шамыч, тудлан поснак шӱман улына! Арам огыл 11 июльышто уло тӱнямбалне Шоколадын кечыже палемдалтеш. 

«О, мыйын шоколадем!»

Параньга районысо Кугу Пумарий селаште шочшо, кызыт Йошкар-Олаште илыше мотор марий ӱдыр Анастасия Шереметьевам гын ик эн пиалан айдемыланат шотлаш лиеш, очыни. Вет тудо шоколад гыч тӱрлӧ кочкышым ямдыла. Уке, иктаж кугу фабрикыште огыл, а шкенжын изирак производствыштыжо. Тудыжо Йошкар-Оласе «Плаза» ужалыме рӱдерыште верланен. Туштак ӱдыр изирак кевыт-отделым почын да ыштыме сатужым калыклан темла.  

Шоколад гыч шке кид дене ямдылыме ателье-производствыжлан Анастасия моткочак оҥай лӱмым пуэн. Тудо «Oh, my choco!» але марлаже «О, мыйын шоколадем!» маналтеш.

Банк пашажымат коден каен

Шоколад деке корныжо тудым кузе конден, йодыда? Йӧршеш вучыдымын!   Кугу Пумарийыште шочын гынат, вараже лу ияшыж марте ешыже Марий Турек посёлкышто илен. Тылеч вара 2000-ше ийыште ты еш Йӱдвелыш илаш да пашам ышташ каен. Кызытат ача-аваже, изаже ешыж дене туштак илат. А Настя 11 классым тушто, Ханты-Мансийский округысо Советский олаште, пытарен да тунемаш Марий Элышке пӧртылын. Тыште тунамсе Марий кугыжаныш технический университетын экономический факультетшым тунем лектын.

— Тора вер-шӧрыш изиэм годымак наҥгаенытат, мыйын эре шочмо кундемышке пӧртылмем шуын. Санденак латикымше класс деч вара политехыш тунемаш пуренам да уло ешем йӱдвелыште ила  гынат, тушко каяш кумылем  лийын огыл, — ойла самырык амалкалче.

Кӱшыл шинчымашым налмеке, ӱдыр ик организацийыште бухгалтерлан, вара банкыште пашам ыштен. Икмыняр ий ончыч марлан лектын да … илышыжым моткочак туран вашталтен. Тудо эсогыл чапланышылан шотлалтше банк пашажымат коден каен, шкенжым пӱтынек чонжылан келшыше сомыллан  пӧлеклен.

— Тидын дене шуко оксам ыштен налаш огеш лий. Адакшым индивидуальный предприниматель семын изи огыл налогым тўлыман, пӧлемым але кумдыкым айлымылан, ятыр-ятыр молылан шийвундо кўлеш. Чыла тиддеч вара шкан парышыже изиш веле кодеш. Туге гынат паша чонемлан келша, да уло кумылын ыштем, — палдара Анастасия.

Шке пашам тӱҥалаш такше шагал огыл окса кӱлеш. Тудлан ты шотышто куштылгырак лийын. Молан манаш гын, тӱҥалтыш капитал дене ача-аваже, изаже полшеныт.

Шерге, гранате, помаде…

Тиде фирмын ямдылыме сатуж дене мый тений март тӱҥалтыште Деловой ӱдырамаш-влакын форумыштышт палыме лийым. Тунам калыклан ончыкташ да ужалаш самырык предприниматель мом-гына конден огыл ыле?! Тӱрлӧ кӧрган кампет, ӱдыр, ӱдырамаш-влакын пайдаланыме «ӱзгар» ден «арвер-влак», мутлан: помаде, шерге, фен.. Тыгак рвезе ден пӧръеҥ-шамычымат ӧрдыжеш коден огытыл да утларакше нунын кучылтмо наста-влакым: тидым-тудым тӧрлаташ ключым, чӧгытым, тыгак гранатым, пистолет ден патрон-шамычым, ятыр молым – кочкаш темленыт. Мераҥ, пий, пырыс, моло фигурко – чылажым каласенат от пытаре. Эсогыл чияш йӧршӧ гаяк кугытан туфльым  кочкаш налаш лиеш! Икманаш, мом шонет, кеч-могай «арверым», «ӱзгарым», «модышым», вургем ден йолчиемым – чыла гаяк тамлен кертат.

Мо оҥайже, нунын кузе ышталтмыштым, тиде паша мыняр жапым налмым, процесс кузе кайымым шке шинча денак ужашат йӧн уло! Ончыч Настя мастер-класслашке коштын гын, ынде тудо кумылан-влаклан туныктымашым эртара, мом кузе ышташ лийме дене палдара. Тидыже моткочак сайыс! Иктаж кечын мыят миен толшаш…

«Плаза» ужалыме рӱдерын нылымше этажыштыже производствым почмылан да ужалаш тӱҥалмылан тений сентябрьыште ик ий веле темеш. А ты пашам амалкалче такшым кокымшо ий шукта. Тылеч ончыч шоколад гыч тӱрлӧ  кочкышым мӧҥгыштыжӧ ыштен.

Тиде пашам шукташ тӱҥалаш шонымашыже кузе лекме нерген Анастасия тыге каласыш:

— Кызыт шукыжым телевизорышто, Интернетыште ужына. Мыят ик передачыште онченам, да моткочак келшен. Тылеч вара мом кузе ыштышашлан тунемаш кумылем лектын. Сандене Москваште кум гана мастер-классым эртенам. Интернетыштат туныктат, но тушто налме шинчымаш гына шагал. Тунемме деч вара шуко-шуко практике кӱлеш.

Кумылет уло гын, кеч-момат ышташ лиеш. Но ыштымеке, эше ужалаш кӱлеш.

— Кызыт тугай жап – кеч-могай сатумат Интернетысе соцкылла гоч темлаш куштылгырак да йӧнанрак. Тӱҥ шотышто шочмо кече, пайрем-влак вашеш ыштен пуаш йодыт. Ужалыме рӱдерыште калыклан шоколад гыч тӱрлӧ сатум темлена гынат, утларакше еҥ-влакын йодмышт почеш ыштена, — пытартышлан каласыш самырык предприниматель Анастасия Шереметьева.

Любовь Камалетдинова.

Опубликовать в Одноклассники

Добавить комментарий