Сочиненийын всероссийский конкурс кышкарыштыже Марий Элыште марий йылме дене сочинений конкурсым эртареныт. Жюри 23 йочан пашажым аклен.
Сеҥышыш Жанна Чайкина (Шернур посёлкысо 1-ше №-ан школ, 4-ше класс, «Шочмо йылмын ямже», «Йылме еҥын кӧ улмыжым ончыктен шога, йылме деч посна айдеме ок лий» номинаций), Андрей Никифоров (Волжский район Кугу Корамас школ, 7-ше класс, «Книга – тиде илыш йолташ» серыш, «Книга – айдеме гай, кажныжын шке пӱрымашыже, койыш-шоктышыжо: 2018 ийыште сылнымутан произведений-влакын лӱмгечышт» номинаций), Дмитрий Кушаков (Советский район Кадам школ, 8-ше класс, «Ушан-шотан лияш – пиал», Шÿшпык семже дене, айдеме ушыж дене мотор» номинаций), Лариса Григорьева (Морко посёлкысо 1-ше №-ан школ, 10-шо класс, «Шочмо йылме гоч айдемын чонжо палдырна» серыш сынан сочинений, «Йылме еҥын кӧ улмыжым ончыкта, йылме деч посна айдеме ок лий» номинаций).
А теве рушла возышо-влакын сочиненийыштым конкурсын федеральный этапышкыже колтеныт. Марий Эл гыч ныл тунемшылан тыгай пиал шыргыжалын. Нуно серышым, очеркым, ойлымашым але эссем возеныт. Чылаже 12 теме лийын: Россий писатель, поэт, драматург-влакын лӱмгечыштлан, Доброволецын идалыкшылан, Россий калыкын келшен илымые идалыкшылан, Балет да опер идалыклан пӧлеклалтыныт.
Марий Эл гыч всероссийский конкурсыш 44 тунемше ушнен. А федеральный этапыш Ксения Бессонован (Волжский район Пӧтъял школ, 4-ше класс) Валерия Отмахован (Йошкар-Оласе 15-ше №-ан школ, 6-шо класс), Мария Ерошкинан (Козьмодемьянскысе «Дарований» школ-интернат, 8-ше класс), Валерия Сорокинан (Йошкар-Оласе 4-ше №-ан школ, 11-ше класс) пашаштым колтеныт.
Сеҥышым 26 октябрьыште палемдат.
Л.ШАБДАРОВА.
