21 декабрьыште Республикысе курчак театрыште Марий Эл вуйлатышын кок Ёлкыжо эртен. Икымшышкыже инвалид, ача-аван полышыж деч посна кодшо ден тулык икшыве, мер ушемын чолгаеҥже-влак (чылаже 200 еҥ) чумыргеныт.
Йӱштӧ Кугыза ден Лумӱдырын саламлымашыштым налаш Медведево район Лӱльпан йочапӧрт ден Октябрьский школ-интернат, Волжский районысо реабилитаций рӱдер, Йошкар-оласе 1-ше, 2-шо №-ан коррекционный школ-влак, Савинысе школ-интернат, Бауман лицейын тазалык шотышто ойыртемалтше икшыве-влаклан полышым пуышо рӱдерже, Семёновко селасе школ-интернат гыч ӱдыр-рвезе-влак миеныт. Нуным Марий Эл вуйлатышын лӱмжӧ дене Правительстве председательын икымше алмаштышыже С.Сметанин саламлен. Тудо Марий Эл вуйлатышын Ёлкыжо йӱлаш пурен шуэш манын ӱшанен каласен. Залыште улшо ача-ава-влакат Марй Эл вуйлатышылан кугу таум ойленыт.
— Ме тиде пайремым эртарыше-влаклан таум каласем, молан манаш гын ӱдырем дене шагал годым пайремлашке коштына. Шукыжым мӧҥгыштӧ шинчена, вет инвалид коляске дене умбаке от кай. Таче шинчаштем куан шинчавӱд, молан манаш гын Евам весела пайрем шӱлыш авалтен, — каласыш мыланна ӱдырын аваже Татьяна Зотина.
Кечывал деч вара кож йыр школышто сай шинчымашым ончыктышо ӱдыр-рвезе-влак погыненыт. Нуно, Ёлкыш логалаш манын, шкешотан конкурсым эртеныт. Республикын чыла районжо, олалаж гыч 200 икшыве ик татлан йомак тӱняш пурен. Пӱсӧ уш-акылан йоча-шамычым Марий Эл Правительстве председательын икымше алмаштыже А.Россошанский А.Евстифеевын да шке лӱмжӧ дене саламлен, тазалыкым, пиалым, ача-авам, туныктышым колышташ тыланен. Тудын мутышкыжо Правительстве председательын икымше алмаштышыже М.Васютин ден тӱвыра, печать да калык-влакын пашашт шотышто министр К.Иванов ушненыт. А мучаште чыланат Александр Евстифеевлан поро У ий тыланымашым рӱж каласеныт.
Пайремын геройжо-влакым кож воктене ужмеке, йоча-шамычын чурийышт волгалтын. Нуно Йӱштӧ Кугыза, Лумӱдыр, Бармалей, Туземец, Айболит, Маймыл дене пырля муреныт, куштеныт. А иман мотор воктене тавалтымеке, чыланат «Цветик-семицветик» спектакльым онченыт.
— Мылам республикнан тӱҥ ёлкыштыжо лияш моткоч куанле. Палем, тыгай пайремыш логалаш манын, идалык мучко тыршыман. Сандене вес ийынат сайын тунемаш товатлем. А тений « Пластик бутылка – величестве» конкурсышто ойыртемалтынам. Тыгак мылам кушташ келша, шочмо йылмем, калыкем йӧратем, садлан мероприятийыш марий тувырым чиен толынам, — мане Параньга район Матародо школын 4-ше классыштыже тунемше Карина Антропова.
Л.ШАБДАРОВА.
М.Скобелевын фотожо.
