Кодшо каныш кечылаште Медведево район гоч йоген эртыше Студёнка энер воктенысе кумдыкышто «3D — 2020» моткоч ӧрыктарыше турнир эртен.
Тушко погышо-влак анлимитед, спортинг, арбалет, олимпик, баребоу, инстинктив, исторический лонгбоу, пикш дене лӱйкалымаште таҥасеныт.
Ятыр шомакше тыглай еҥлан нимо нергенат ок ойло гын, умылышыжо умыла, очыни. Арбалет да пикш дене лӱӥкалымашыж нерген шукынжо колыныт. Марий-влакат тыгай таҥасмашым шуэн, но эртарат. Участник-влак шкештат тыгай пайрем гыч кумыл нӧлтшӧ каеныт. Тидын нерген соцкылысе лаштыкыште возымышт гычат умылаш лиеш: «Ме йомак тӱнясе дене таҥастараш лийше поҥгылан поян чодыра трассым эртенна, тушто ий гай йӱштӧ вӱдан эҥерат, кишке илыме верат, вучыдымо моло пӱртӱс «уна» вашлиялтме, волен кайыман ошма кумдык-влакат лийыныт. Кужу жап ме эше пырля таҥасыме йолташ-влакым, тулото воктене шинчылтме татым, тулеш кӱктымӧ тутло пловым, йӱд каваште чолгыжшо шӱдыр-влакым шарнаш тӱҥалына. Тау организатор-влаклан». А эртарен турнирым «3D в Марий Эл» организаций. Участник-влак пошкудо Татарстан гычат лийыныт. Мучашлан ойыртемалтше-шамычымат палемденыт.
С.НОСОВА
Фотом организацийын соцлаштыкше гыч налме
