Шке интернет лаштыкыштыже тыгай йодмаш дене «Ижевск мари» мер организаций вуйлатыше Николай Ямаков лектын. «Марий-влак деч посна нигузе ок лий», — манеш тудо.
Пашаже теве кушто. Ты организаций кодшо ийын Ижевск олан Общественный палатыжын эртарыме «Обычный герой» социальный проект-влак конкурсыш ушнен да «Идалыкын кувавайже» конкурсым эртарен. Тудо тӱрло национальностян 9 еҥым ушен кертын. «Ижевск мари» тугакшат тӱрлӧ конкурсым эртара, социальный сынан проект-влакым илышыш шыҥдара. Теве ынде тений тудо «Идалыкын кочайже — 2019» у конкурсым увертарен. Проект Ижевск олан социально кӱлешан проект ден программе-влак конкурсышто «Келшымаш да ваш келшен пашам ыштымаш» номинацийыште сеҥен.
«У конкурсыш кандаш калык гыч кочай-влакым ушен кертме», — палемдыш организаторжо телефон дене. Нунын коклаште белорус, еврей, казак, руш, одо, украин, чуваш улыт. Марий-влак деч Александр Ипаев лиеш. Тудо 82 ияш гынат, «Ижсталь» ПАО-што эше пашам ышта. Сай специалистлан шотлалтеш, санденак тудым тушеч ынешт колто. Кок икшывыже, вич уныкаже уло. Лач тудланак 14 декабрь марте Николай Ямаков лудшына-шамычымат ВК социальный лаштыкыште йӱкым пуаш йодеш.
Участник-влак «Мыйын тӱня» фотовыставкым, «Ийгот ойго огыл» визитный картычкым ямдылат, артист койышым ончыктат, шке калыкыштым палымышт шотышто интеллектуальный викториныште участвоватлат. Конкурсым иктешлыше мероприятий «Русский дом» руш тӱвыра рӱдерыште 15 декабрьыште эртышаш.
С.НОСОВА
Снимкыште: А.А.Ипаев.
