США-се Техас штатыште национальный выставке-ярмиҥга эртен. Тудо утларакше Хьюстонский Родео семын палыме.
Родео кумдыкыш тений 2,5 миллион утла еҥ погынен. Ончаш толшо тыглай еҥжат, тыгак Йўдвел да Латинский Америкысе, Европа ден Азийысе, Австралийысе да Океанийысе 90 утла эл гыч ялозанлыкыште тыршыше профессионал-влак погыненыт. Тыгай выставке опыт дене палдараш, пашаче кылым пеҥгыдемдаш, у ужалыме-инвестиций йӧн-влакым шараш полша.
Марий Элын Ялозанлык да продовольствий министерствыже да ялозанлык сатум ыштен налше-влакын региональный ассоциацийышт Хьюстон олаште Россий Федерацийын генеральный консульствыжын полшымыж дене Российысе регион-влакын экспозицийышт дене пырля Марий кундемнан торговый, промышленный да инвестиций куатшым ончыктымо. Тыгодым ялозанлык сатун экологий могырым яндар улмыжым, калык промысел изделийын ойыртемжым шотыш налме. Выставкыш толшо-влаклан Марий Элысе «Чай Руси» ООО-н ферментироватлыме вуйдеҥге гыч ямдылыме чай напиткыже-влак поснак келшеныт.
В. Смоленцев
(Фотом Ялозанлык да продовольствий министрствын сайтше гыч налме.)
