СОЦИАЛ ИЛЫШ

Кызытеш раш огыт палдаре     

Марий Эл Республикын прокуроржо Сергей Рюмшин Кугыжаныш Погын  председатель Юрий Минаков лӱмеш депутат Иван Казанков шотышто судын приговоржын илышыш пурымыж нерген уверым колтен.

Прокуратурын палемдымыж почеш, Иван Казанковым Звенигово районысо судын 2017 ий 28 февральыште лукмо приговоржо дене келшышын,  2014 ий ноябрьыште пушеҥгым закондымын руымыжлан титаканлан шотленыт. Тидлан депутатлан 1 миллион теҥге штрафым тӱлыкташ палемденыт. Но Кугу Отечественный сарыште сеҥымылан 70 ий темме лӱмеш увертарыме амнистий почеш 2015 ий 24 апрельысе акт почеш Иван Казанков тиде уголовный наказаний деч утаралтын.

Звенигово районысо судын тиде приговоржо денак депутат тыгай сынан вес преступленийым ыштымыжлан титаклалтын. Тудо 2015 ий июльыштат пушеҥгым закондымын руэн манын палемдалтеш. Тунам И.Казанковын кӱштымыж почеш Звенигово лесничестве кумдыкышто 1,1 гектарыште 247 кубометр пушеҥгым руэныт. Тидлан Иван Ивановичым 1 миллионат 200 тӱжем теҥге штрафым тӱлыкташ пунчалыныт. Судын тиде приговоржо тений 11 мартыште илышыш пурен.

Закон почеш, судын лукмо тыгай приговорын илышыш пурымекше, Кугыжаныш Погынын депутатшын полномочийже жап деч ончыч пыта. Шукерте огыл, 26 апрельыште, Марий Эл Республикын прокуроржын  представленийже почеш республикын Кугыжаныш Погынжо Иван Казанковым  логалаш лийдыме (неприкосновенность) да депутат статус деч посна коден. Палемдыме почеш,  тудын шотышто кок уголовный делам тарватен кертыт. Ты шотышто мо да кузе улмым кызытеш огыт палдаре.

Л.Камалетдинова.

Опубликовать в Одноклассники