Эртыше каныш кечын Куяр воктенысе чодыраште курыкышто куржталме дене Российын чемпионатыштыже Марий Элын ӱдырамаш командыже нылымше верыш лектын.
– Тидыжым эн сай результат семын палемдыман. Мемнан землячкына, тӱнямбал кӱкшытан спорт мастер Людмила Лебедева ӱдырамаш-влак коклаште абсолютный чемпион лийын. Чаманаш гына кодеш, кумшо верлан улыжат ик очко ситен огыл, – ойла куштылго атлет, ты таҥасымашын участникше В.Мартьянов. – Икымше вержым Самарак область, кокымшым Самара область гычак кокымшо командыже, кумшым Санкт-Петербургын сборныйжо налыныт.
Пӧръеҥ-шамыч коклаште икымшыш Пошкырт кундем гыч команде, кокымшыш пошкудо Татарстанын, кумшо верыш Санкт-Петербург гыч команде-влак лектыныт. Абсолютный чемпион – Татарстан гыч Геннадий Егоров. Марий Элын пӧръеҥ сборныйжо шымше верыште лийын.
Ты вид дене черетан вес таҥасымаш 20 сентябрьыште Волжский районышто лиеш. Мӱшыл ер йыр курыкышто куржталме дене Волжский районын чемпионатше дене первенствыже Марий Элын 100 ий теммыжлан пӧлеклалтеш.
Старт 11 шагатат 45 минутышто пуалтеш.
Е.ЭШКИНИНА
