Сонарлыме да кол кучымо ӱзгарым ужалыме гыч кӱртньым таптыме да варитлыме марте – теве могай корным эртен Шернур гыч амалкалче кумылан Ю.В.Савинцев. Тыгай савыртышым ышташ, мутат уке, изи огыл чолгалык кӱлын. Кеч Юрий Владимирович шкеже вес семын шона: «Кок пашажат сезон дене кылдалтын. Сандене, кузе ончыч, тугак кызытат телым паша уке гаяк». Туге гынат шке ыштымым ямдым ужалыме дене от таҥастаре – тиде йӧршын у кӱкшыт.
Кӱртньым таптыме да варитлыме пашаш кузе толында манын йодмыланат тудо пеш тыглай вашештыш: «Ала-мом весым ыштыме шуын. Да еҥ деч ямде бизнесым налме». Тиде манаш гына куштылго. Чынжым гын, тудо ончысо оза деч лач оборудованийым налын, а зданий арендыште лийын. Пашаеҥ-влакым гын угыч поген. Шкежат тиде пашам пален огыл, молыштланат тунемаш логалын. Йӧра, нунышт сварщик лийыныт гын, тидлан жап шукак кӱлын огыл. Теплицым, мончалык котёлым, кӱртньӧ саварым ыштыме гыч тӱҥалме у бизнесым. Тӱҥалынже Юрий Владимирович, пашажымат кызыт тудак шуя, а амалкалче сомылжым пелашыже Ольга Александровна ӱмбаке кусарен.
– Куд ий лиеш ынде ты бизнеслан. Мастарлык ты жапыште, мутат уке, кушкын. Ончычсо продукций деч посна тыгак беседкым, козырёк але навес манме леведышым, таптыме изделийым, кўртньє капка ден печым ямдылена. Кўлеш гын, шкеак поген, шынден пуэна, – каласыш Юрий Владимирович.
– А теплицыда мош шуэш? – сад участкем уло гын, йодде шым чыте.
– Акше кугытым да металлын шергештмыжым онча, – вашештыш тудо. – А металл ак, кеч профильым, кеч профнастилым нал, май тӱҥалтыш гыч кок пачаш утлалан кугемын. Тидыже мемнам тургыжландара – заказ палынак шагалемын. Сезонлан кӧра гына тудо эше уло.
Миймына годым пашаеҥже кӱртньӧ капкам ыштен гына пытарен ыле. Тыгайым варитлен, а сєрастарымашыжым таптен ышташ кугу мастарлык кӱлеш. Ончыч ыштыме моло продукцийыштымат электрон папкыште ончал лекна гын, єраш гына кодо: чынжымак сӧрал! Сандене амалкалче кумылан еҥ вигак мане: «Кузе ыштымына продукцийна гычак коеш. Заказ гына лийже».
Юрий ИСАКОВ
