9 май поздр.
Кугу Отечественный сарын шергакан ветеранже-влак, тулыкеш кодшо вате, тылыште тыршыше-влак!
Марий Эл Республикыште илыше пагалыме еҥ-влак!
Мемнан элын историйыштыже эн кугу пайрем, чылаланна путырак шергакан да шнуй кече — совет калыкын Кугу Отечественный сарыште Сеҥыме кечыж дене — тендам саламлем!
9 Май – тиде мемнан калыкын лӱмжым чапландарыше пайрем. Тудо элнан историйыштыже посна верым айла да пеҥгыдылык ден патырлыкым, лӱддымылык ден кугу кӧргӧ вийым, шуко национальностян элын икоян улмыжым, Родиным уло чон дене йӧратымым ончыкта.
1945 ийысе сеҥымаш шошо деч вара кеч-мыняр ий эртыже — ме садикте сар пасуэш вуйыштым пыштыше-влакым шарнаш, шучко сарым илен лекше-влак дене кугешнаш тӱҥалына. Ме тылыште тыршыше ден сарын икшывыже-влакын Сеҥымаш верч могай акым тӱлымыштым огына мондо. Тудо шучко сарын геройжо-влакым тауштен шарнымаш мемнан шӱмыштына эре ила.
Марий Элыште илыше 130 тӱжем еҥ фронтыш каен. 70 тӱжемже сӧй пасу гыч пӧртылын огыл. Ӱшанле тылым ыштымаште республикыште илыше еҥ-влакын надырышт героический лийын. Пӧръеҥ ден ӱдырамаш-влак, шоҥгыеҥ ден ийготыш шудымо йоча-влак «Чылажат — фронтлан! Чылажат – Сеҥымашлан!» шонымаш дене лым лийде пашам ыштеныт.
Ӱшанем, кӧ фронтышто кредалын, тылыште тыршен, шаланыше калык озанлыкым йолваке шогалтен, нунын кугу подвигышт нигунамат огеш мондалт. Мемнан порысна – Кугу Сеҥымашын историйжын кажне страницыже переген аралалтше да кушкын толшо самырык тукымлан кодшо, а ветеран-влак Марий Эл Республикыште сайын илышт манын, мом лиеш гын, чылажымат ышташ.
Шергакан ветеран-влак, тылыште тыршыше-шамыч, Кугу Отечественный сарыште кредалше-влакын тулык ватышт, чыланат, кӧ Сеҥымашым таптен! Тыланда мланде марте вуйнам савена, ме тендам пагалена да уло чон дене таум ыштена. Тек родо-тукымда ден лишыл еҥда-влак тыланда эҥертыш лийыт да тӱткышым ойырат, шке сеҥымашышт да пашаште шумо лектышышт дене куандарат. Пеҥгыде тазалыкым, сай илышым, куаным тыланда да лишыл еҥда-влаклан чон шокшым тыланем!
Марий Эл Республикым Вуйлатышын пашажым жаплан шуктышо А.А.Евстифеев.
